Desportu
LFTL ho Klube Sira Diskute Planu Asaun 2022-2025
Hatutan.com, (21 Janeiru 2022), Díli- Órgaun ezekutivu Liga Futeból Timor Leste (LFTL), Sesta (21/01/2022), organiza sorumutuk ho prezidente klube sira husi primeiru divizaun no segundu divizaun hodi diskute planu asaun LFTL nian ba tinan 2022-2025 no preparativus ba LFTL époka 2022.
Prezidente LFTL, Nilton Telmo Gusmão dos Santos. Foto/Hatutan.com
Marka prejensa iha enkontru ne’e prezidente no reprezentante husi klube hamutuk 16 mak hanesan, As Ponta Leste Fc, Karketu Díli Fc, AD SLB Laulara Fc, Fc Porto Taibesse, Santa Cruz Fc, Atletico Ultramar Fc, DIT Fc, Academica Fc, Kablaki Fc, Lica-Lica,Lemorai Fc, Fitun Estudante Fc, Lalenok United Fc, Emanuel Fc, As Marca Fc, Nagarjo Fc.
Enkuantu klube hat seluk hanesa Boavista Fc, Sporting Klube de Timor, Aitana Fc, Zebra Fc nia reprezentante la marka prejensa no la iha konfirmasaun ho orgaun Liga.
Prezidente LFTL Nilton Telmo Gusmão dos Santos ba jornalista sira, Hotel JL Villa, Fatuhada, Dili, hateten reuniaun ne’e nu’udar meiu ida atu tur hamutuk ho klube hotu husi Primeira divzaun no mós husi segundu divizaun, atu nune’e, bele hamutuk enfrenta époka ne’e hodi kontinua lori progresu no dezenvolvimentu futebol iha Timor Leste.
“Enkuantu ne’e atu bele ein-rikeza liután hanoin sira atu orgaun liga bele elabora planu asaun ba dezenvolvimentu iha ita nia rain,” Nilton Gusmão hateten.
Iha reuniaun ne’e parte orgaun LFTL rona mos klube hotu nia preojupasaun no hanoin sira oinsa bele realiza liga iha époka 2022 ho di’ak no susesu tuir ema hotu nia hakarak.
Iha epoka 2022 LFTL sei iha klube hamutuk 10 mak sei kompete iha primeira divizaun no segunda divizaun ho klube hamutuk sai (9).
Prezidente karketu Dili Fc, José Adilson Ribeiro hateten orgaun LFTL konvida klube sira mai halo avaliasaun no tau ideia hamutuk atu orgaun liga bele iha ideia hodi halo planu asaun liga nian ba tinan tolu oin mai hahu husi epoka 2022-2025.
Prezidente Emanuel Fc, Alexo do Carvalho Monteiro, hateten Liga atu la’o di’ak presija komponente hotu nia kontribuisaun, tanba ne’e, enkontru ne’e lori valor pozitivu tamba orgaun liga no klube sira hotu bele iha konkordansia ba planu sira hodi bele realiza liga tuir ema hotu nia mehi.
“Ami nia parte kontente ho enkontru ne’e tamba bele akumula klube sira iha LFTL nia planu asaun,” Alexo do Carvalho Monteiro hateten.
Tuir horariu tentativa husi órgaun LFTL, liga époka ne’e sei hahú iha fulan-Marsu tamba orgaun liga sei hein konfirmasaun husi kalendariu jogu internasional sira ne’ebé selesaun nasionál sei partisipa, atu nune’e, la bele mosu dezintendimentu ho kalendatriu FIFA no LFTL nian.
Jornalista: Vito Salvador