Kompete iha Eleisaun Prezidensiál, PD Depozita Konfiansa ba Assanami

Hatutan.com, (22 Janeiru 2022), Díli-Primeira konvensaun nasionál Partidu Demokratiku (PD) ne’ebé hala’o iha Dili, Sábadu (22/01/2022), mai ho rezultadu liuhusi aklamasaun hodi depozita konfiansa ba Mariano Assanami Sabino nu’udar kandidatu úniku Partidu Demokrátiku nian iha Eleisaun Prezidensiál 2022-2027.

Mariano Assanami Sabino. Foto/Hatutan.com

Maioria militante, kuadru no delegadu partidu jerasaun foun ne’e husi nasionál no munisípiu sira afirma sira-nia konfiansa no sei servisu maka’as atu lori Mariano Assanami Sabinu ba tuur iha kadeira númeru um Palásiu Aitarak Laran, Dili.

Iha prosesu konvensaun nasionál ne’e delegadu sira  halo aklamasaun hodi konvense Prezidente Komisaun Politika Nasional PD,  Adriano do Nascimento “Loro Mau” hodi retira nia kandidatura no fó oportunidade ba prezidente PD Mariano Assanami Sabino avansa hodi reprezenta PD.

Prezidente Komisaun Politika Nasional PD  Adriano do Nascimeto “Loro Mau” hateten, nia retira kandidatura iha prosesu demokratiku ne’e tamba hetan aklamasaun maioria husi militante sira husi munisípiu hotu iha territóriu nasionál.

“Ha’u moralmente no etikamente hato’o responsabilidade ba Assanami nu’udar superiór ne’ebé kleur liu iha PD liu husi konsensu ho militante no simpatizante sira PD nian hotu,” Adriano do Nascimento “Loro Mau” hateten.

Prezidente Komisaun Politika Nasional PD hatutan hanesan lideransa PD nafatin iha prontidaun no moralmente sei fó apoiu tomak ba prezidente PD nia kandidatura.

Mariano “Assanami” Sabino iha nia diskursu hateten, konvensaun iha atu  aprova kandidatura husi partidu, tamba ne’e, konvensaun la’ós de’it atu tenke iha votasaun, maibé dalan ida mak konsensus atu hetan kandidatura ida-ne’e mak mekanizmu iha konvensaun nia laran.

“Estatutu partidu fó dalan atu iha konvensaun tamba ne’e atu kandidatu ida de’it mos tenke liu husi konvensaun atu hetan aseitasaun husi kuadru no militante partidu nian,” Mariano “Assanami” Sabino hateten.

Sabino orgullu ho prosesu ne’ebé PD hatuur tamba ida ne’e hatuur prinsípiu lolos demokrasia nian. Tamba ne’e, programa ne’ebé kuda iha PD sei sai referénsia hodi ba ukun.

“PD oferese nia kandidatura atu sai prezidente ba povu tamba ne’e PD sei hamutuk ho povu ba vitória iha eleisaun prezidensiál,” Mariano Assanami Sabino hateten.

Konvensaun nasional PD ne’e iha legalidade bazeia ba akta konvensaun nian ne’ebé hetan aprovasaun husi prezidente  meza konvensaun Antonio da Conceição “Kalohan”, vise-prezidente Samuel Mendonça no Octavio da Conceição, sekretáriu meza Leoneto Amaral no vise-sekretáriu Terezinha Amaral Lopes no akta ne’e konfirma ho aseitasaun husi kuadru no militante PD ne’ebé partisipa iha konvensaun nasional ne’e.

Jornalista: Vito Salvadór