CNRT Deside ho Aklamasaun Mantein Estrutura CPN

Hatutan.com, (23 Janeiru 2022), Díli—Konferénsia nasionál partidu Kongresu Nasional Rekonstrusaun Timor (CNRT, sigla portugés) ne’ebé hala’o iha Salaun OKA, Surik Mas, Dili, Segunda (23/01/2022), deside ho aklamasaun mantein estrutura Komisaun Polítika Nasionál (CPN, sigla portugés) to’o Eleisaun Parlamentár (ElPar)  nia rohan iha 2023.

Prezidente Partidu CNRL, Xanana Gusmão ho Sekretariu Jerál Partidu CNRT, Francisco Kalbuadi Lay. Foto/Dok.Espesiál

Iha konferénsia nasionál ne’ebé partisipa husi estrutura nasionál no munisípiu sira ho total ema 1.600 ne’e deside no nomeia Gil Oan Suru nu’udar Segundu Vise Prezidente hodi troka Saudozu António da Costa ka koñesidu ho naran kódigu rezisténsia nian M’huno  Bulorek Karathayano ne’ebé husik ona mundu ne’e iha loron Sesta, 24 fulan-Setembru 2021.   

Kompozisaun estrutura CPN partidu CNRT ne’ebé konferensista sira deside ho aklamasaun mak hanesan, Prezidente partidu Kay Rala Xanana Gusmão, Primeiru Vise Prezidente, Virgilio Smith, Segundu Vise Prezidente  Gil Oan Soru, terseiru Vise Prezidente Maria Rosa Camara “Bisoi”, kuatru Vise Prezidente Thomas Cabral, Kintu Vise Prezidente  Bendito Freitas, Sestu Vise Prezidente, Francisco da Costa ‘Iku Lai’, Sekretariu Jerál, Francisco Kalbuadi Lay, primeru Vise Sekretáriu JeráI, Jacinto Rigoberto de Deus Gomes, Segundu Vise Sekretáriu Jerál, Francisco Guterres, Terseiru Vise Sekretariu Jerál, Vicente V. Roque.

“Konferénsia nasionál partidu CNRT nian ne’e mai ho desizaun tolu; ida, ajusta estrutura CPN nune’e Gil Oan Soru ba Segundu Vise Prezidente hodi substitui Saudozu M’huno  Bulorek Karathayano, rua, konferénsia minsipiu no kongresu adianta ba eleisaun jerál 2023 hotu  no tolu maka nomeia Laureadu Nobel ba Paz 1996, José Manuel Ramos-Horta nu’udar kandidatu úniku CNRT nian ba eleisaun prezidensiál 2022,”  Prezidente Konsellu Diretiva Nasionál (CDN, sigla portugés), Dionísio Babo Soares informa ba Hatutan.com.   

Konferénsia nasionál partidu CNRT ne’ebé lidera no modera diretamente hosi “Maun-Boot” Kay Rala Xanana Gusmão  ne’e, la’o ho demokrátiku no trankulidade hodi deside aklamasaun mantein estrutura CPN  anteriór  nu’udar rezultadu husi Kongresu Nasionál CNRT nian durante loron tolu, hahú husi loron 28-30 fulan-Abríl 2017.

Jornalista: Vito Salvadór