Guarda Prizionál Tenke Indeniza $1.000 Tanba Deve Osan La Fó Fila

Hatutan.com (25 Janeiru 2022) Díli—Tribunál Distritál Díli (TDD) liu hosi leitura sentensa ne’ebé lee hosi juiz prezide Ercilia de Jesus, kondena Funsionáriu Guarda Prizionál arguidu Helder Afonso Fernandes inklui nia kaben arguida Marciana da Costa ho indenizasaun sivíl ho montante $1.000.

Tribunál Distritál Díli. Foto/Hatutan.com.

Indenizasaun ne’e, tanba konsidera faktus provadu bazeia ba konviksaun arguidu ho arguida maske deklarasaun lezada nian diferente ho arguidu sira nian, liu-liu kona-bá montante osan ne’ebé sira deve.

Notisia iah Relasaun:Deve Osan $5.400, Tribunál Bolu Guarda Prizionál Ida

Tribunal mós konsidera faktus provadu katak, arguidu na’in rua ba iha lezada nia uma, hodi empresta osan dala rua ho totál montante $5.400.

Maski arguidu sira fó ona karreta ida ho valór $4.500, maibe to’o agora seidauk selu hotu inklui osan funan tuir akordu ne’ebé halo 30%.

Tribunál absolve arguidu no arguida hosi krime burla agravadu, tanba la prienxe elementu krime ho razaun momentu arguida no arguida ba empresta osan la uza maneira bosok, hodi konvense lezada hodi fó nia osan ba arguidu sira atu empresta, maibé ho lezada nia hakarak liu hosi akordu ne’ebé parte rua halo.

Tribunál konsidera ida-ne’e, la’ós krime burla agravadu no kazu ida kategoria ba kazu sivíl, tanba ne’e Tribunál absolve arguidu no arguida hosi krime burla agravadu hodi aplika indenizasaun ba arguidu no arguida ho monatante $1.000, hodi selu lezada nia osan ne’ebé seidauk fó.

Antes ne’e, tuir akuzasaun hosi Ministériu Públiku (MP) katak, iha loron 06 fulan Janeiru 2016, arguidu ho arguida ne’ebé hanesan feen ho la’en ba iha lezada nia uma atu empresta osan, no lezada hatan hodi halo deklarasaun katak, semana rua fó fila fali ho nia funan 30% no mós dokumentu karreta Avanza kor mutin hanesan garantia no lezada mós entrega osan ho valór $2.000.

Liu tiha semana rua, arguidu ho arguida ba husu atu empresta tán no lezada mós entrega tán osan ho montante $400, hodi promete semana rua fó fila-fali ho funan ne’ebé hanesan ho razaun kaer projetu hodi fornese hahán ba dadur sira iha Gleno.

Liu loron tolu, arguidu ho arguida husu empresta tán osan $3.000, ho razaun osan ba projetu seidauk sai, tanba ne’e lezada mós entrega tán $3.000, maibé ho funan ne’ebé hanesan ho antes arguidu ho arguida foti ne’e.

Tanba ne’e, totál osan ne’ebé lezada fó ba arguidu ho arguida hamutuk  $5.400, maibé to’o iha loron ne’ebé termina, lezada ba husu arguidu ho arguida atu selu lezada nia osan, maibé arguidu fo fali livrete motór ho ema seluk nia naran no la’ós karreta ne’ebé antes ne’e sai hanesan garantia hodi foti osan.

Konsekuénsia hosí arguidu no arguida nia hahalok ne’e, halo lezada Iakon nia osan ho montante $5.400,ne’ebé to’o agora seidauk fó fila.

Tanba ne’e, MP akuza arguidu ho arguida ba pratika krime burla agravada ne’ebé previstu iha artigu 267 hosi kódigu penál Timor-Leste (TL).

Audensia julgamentu iha Tersa loron 25 fulan ne’e,  prezide hosi juiz kolektivu António Carmona, Ercilia de Jesus no Albertina Neves, Ministériu Públiku reprezenta hosi Prokuradór Reinato Berenahak no arguidu sira hetan aisténsia legál hosi Defensór Públiku.

Jornalista: Carmelita Isaac