JG Nega Faktus Prátika Krime Koasaun Seksuál

Hatutan.com, (27 Janeiru 2022), Díli–Tribunál Distritál Díli (TDD), liu hosi juiz kolektivu Alvaro Maria Freitas, José Gonçalves, Argentino Nunes hala’o primeiru julgamentu ba krime koasaun seksuál ho NUC. 0232/20. DICMR, ne’ebé deskonfia involve arguidu ho inisiál JG, tanba tenta prátika koasaun seksuál ka kaer lezada AC nia isin.

Odamatan, Sala Audiénsia Tribunál Distritál Dili. Foto/Hatutan.com.

Audiénsia iha loron Kinta 27 fulan ne’e, arguidu nega faktus ne’ebé iha katak, arguidu la konsege prátika krime koasaun seksuál ba lezada, la tama lezada nia kuartu no la foti lezada nia telfone.

Hafoin rona arguido, Tribunál Distritál Dili, adi’a hikas julgamentu ba loron seluk, hodi kontinua rona lezada.

Antes ne’e, tuir akuzasaun hosi Ministériu Públiku (MP) katak, iha loron ne’ebé la apuradu, arguidu tenta atu prátika koasaun seksuál ba lezada, iha Bairru ida iha área Munisípiu Díli.

Tanba ne’e, lezada hakilar no bolu nia bin ho aman, ne’ebé konsege hetan arguidu uza kamizola mean no halai sai hosi lezada nia kuartu laran.

Iha momentu ne’ebá, lezada nia aman tenta duni arguidu maibé la konsege kaer, no liu minutu balun viziñu konsege kaer duni arguidu.

Alende ne’e, arguidu mós foti lezada nia temóvel ho marka vivo folin $75, ne’ebé rai iha sumasu okos.

Tanba ne’e, MP akuza arguidu ba prátika krime koasaun seksuál, furtu agravadu ne’ebé previstu iha artigu 171, 252 hosi kódigu penál Timor-Leste.

Audiénsia julgamentu prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Reinato Berenahak no arguidu hetan asisténsia legál hosi Defensór Públiku.

Jornalista: Carmelita Isaac