Sidadaun Indonézia Na’in-rua Tama Ilegál Iha Tilómar

Hatutan.com, (27 Janeiru 2022), Díli—Polísia Nasionál Timor-Leste (PNTL), Unidade Patrullamentu Fronteira (UPF), liuhosi Kompañia Barvo, iha Tersa 25 Janeiru, tuku 11:03 otl, kaptura tán sidadaun Indonézia na’in-rua, kompostu hosi inan ho oan, tanba tama ilegál liuhosi fronteira terrestre, mai área Timor-Leste (TL) nian.

Sidadaun Indonézia na’in-rua ne’ebé, tama illegal mai TL iha Covalima, Tersa 25 Janeiru. Foto/PNTL.

Sidadaun na’in-rua ne’e, tama mai TL nia área, iha Hare We, nu’udár área kontrolu UPF Kompañia Bravo nian, no tama liu mai Aldeia Caicoli, Suku Maudemo, Postu Administrativu Tilomár, iha tuku 17:00, otl.

Notisia iha Relasaun:Sigaru Kontinua Tama Ilegál Hosi Fronteira

Komandante UPF, Superintendente Polísia, Euclides da Costa Belo hateten, informasaun kona-bá sidadaun na’in-rua ne’e, sira nia prezensa ilegál iha Tilómar, tanba simu informasaun hosi Xefe Suku Beseuk, ba Komandante PNTL eskuadra Tilomár no Ofisial Polísia Suku (OPS) Maudemo.

“Komandante PNTL Eskuadra Tilomár, koordena ho UPF, kompañia Bravo no Xefe sentru saúde Tilomár hodi ba halo kedan kapturasaun,” Hatutan.com sita deklarasaun Superintendente Polísia, Euclides da Costa Belo, iha komunikadu.

Sidadaun na’in-rua ne’e ho inisial CN (77), ho nia oan mane ho inisiál MX (25) no iha Indonézia, sidadaun sira ne’e, hela iha aldeia Raihenek, Suku  Rainawe, Postu Administrativu  Kovalima, Repúblika Indonézia.

Objetivu sidadaun na’in-rua ne’e tama mai área Timor-Leste, tanba CN ho nia katuas-oan fahe-malu ona, no nia oan mane boot mós moras hela de’it, nune’e CN labele sustenta ai-han ba nia ho nia oan.

Oras ne’e, sidadaun na’in-rua ne’e, Komandu PNTL Munisipiu Covalima ho UPF entrega ona ba parte Serbisu Saúde hodi ba iha kuarentena Munisípiu Covalima.

Jornalista: Rogério Pereira Cárceres