Defeza & Seguransa
Forsa Rekrutadu 598 Hala’o Juramentu, Governu Sei Rekrutan tán iha 2022
Hatutan.com, (31 Janeiru 2022), Díli—Komandu FALINTIL Forsa Defeza Timor-Leste (F-FDTL), iha segunda 31 Janeiru, realiza serimónia graduasaun ba membru foun na’in-598, ne’ebé konklui ona sira-nia formasaun militár hosi instrutór sira, durante fulan-tolu, iha Centro de Formação e Terreno (CFT), Metinaro.
Komandu FALINTIL Forsa Defeza Timor-Leste (F-FDTL), iha segunda 31 Janeiru, realiza serimónia graduasaun ba membru foun na’in-598, ne’ebé konklui ona sira-nia formasaun militár hosi instrutór sira, durante fulan-tolu, iha Centro de Formação e Terreno (CFT), Metinaro. Foto/Hatutan.com.
Iha serimónia graduasaun ne’e, membru foun sira hala’o juramentu ba Bandeira lulik Repúblika Demokrátika Timor-Leste (RDTL) nian, hodi serví de’it povu ho nasaun.
Notisia iha Relasaun:Governu Aloka Ona Osan ba Rekrutamentu F-FDTL 600 iha 2022
Hakarak Tama Militár, Labele Halimar!
Perante serimónia ne’e, Ministru Defeza (MD), Filomeno da Paixão de Jesus, promete katak, Governu liuhosi Ministériu Defeza, sei kontinua halo investimentu hodi dezenvolve liu tán instituisaun FALINTIL FDTL ba futuru.
Alende ne’e, Ministru ne’e mós fó-sai katak, sei hala’o tán rekrutamentu ba forsa foun iha tinan 2022.
“Ida ne’e mak prioridade boot ba oitavu governu. Tanba ne’e, ita halo ona rekrutamentu primeiru ba 600, agora ita halo daudaun juramentu no tinan ida-ne’e, ita halo tán rekrutamenu. Konsekuentemente, ita tenke halo ekipamentu ba iha farda, ba infra-estrutura, ba uma, kama no meius hotu ne’ebé nesesáriu atu soldadu sira bele hetan avontade no konfortabilidade,” Filomeno da Paixão, promete.
Iha fatin hanesan, Vise Xefe Estadu Maiór Jenerál F-FDTL, Falur Rate Laek, husu ba membru foun sira atu hatudu servisu ho dixiplina, tenke sai ema ne’ebé neutru, no kaer metin valór sira kona-bá siénsia militár nian.
“Rekrutadu sira ne’e tenke dixiplina, abnegasaun, profisionalizmu, neutralizmu, ida-ne’e importante. Valór-sira ne’ebé instituisaun, siénsias militár hanorin ne’e, agora tenke aplika ida ne’e, iha prátika,” Falur Rate Laek, hateten.
Kona-bá planeamentu sira hodi halo kolokasaun ba kada komponente, Falur Rate Laek dehan, ekipa konjunta ne’ebé lidera hosi Xefe Estadu Maiór F-FDTL, Calisto Santos “Coliati”, tanba asuntu ne’ebé tékniku liu atu halo distribuisaun ne’e, prioridade ba komponente navál, terrestre, aéro, nomós forsa apoiu servisu.
Jornalista: Rogério Pereira Cárceres