Tribunál Rekursu Aplika TIR ba Libório Perreira

Hatutan.com (31 Janeiru 2021) Dili—Tribunál Rekursu (TR) liu hosi despaixu ho NUC. 0110/21.TRDIL liu hosi juíz Konsilleiru Duarte Tilman Soares, Jacinta Correia da Costa no Deolindo dos Santos, deside aplika Termu Identidade Rezidénsia (TIR) ba arguidu Libório Pereira, bazeia ba pedidu rekursu ne’ebé hatama hosi Defensór Públiku (DP) Sérgio Quintas.

Eis Prezidente KFP, Liborio Pereira, bainhira partisipa iha julgamentu iha TDD, 07 Novembru 2021. Foto/SMNEWS

Razaun TR aseita pedidu rekursu hosi Sérgio Quintas, tanba primeiru juiz prezide Ana Paula Fonseca viola direitu arguidu, liu-liu prinsípiu de kontraditóriu, signifika iha primeiru interrogatóriu ne’ebé antes ne’e hala’o ona juiz prosesu la rona arguidu no defeza nia deklarasaun.

Notisia iha Relasaun:Kazu Liborio, Defeza Hatama Ona Rekursu Ba TR

Segundu, laiha indísiu forte atu lori arguidu ba aplika medida koasaun Proibisaun ba Auzénsia ou bandu labele sai ba rai liur iha primeiru interrogatóriu ne’ebé antes ne’e hala’o ona, tanba laiha indísius forte katak arguidu komete duni krime partisipasaun ekonómika no negósiu.

“TR haree katak, laiha indísius forte. Tanba ne’e TR simu rekursu hosi Libório Pereira nian hodi hasai tiha medida koasaun proibisaun auzénsia ne’ebé antes ne’e TDD aplika iha primeiru interrogatóriu hodi aplika fali medida koasaun TIR,” Denfensór Públiku Sérgio Quintas hateten iha TDD, Segunda (31/1/2022).

Ho razaun juiz viola direitu arguidu, liu-liu prinsípiu de kontraditóriu ne’ebé previstu iha artigu 246 kódigu prosesu penal, hodi la rona arguidu ho nia mandatáriu, no MP la presiza promove arguidu ba medida koasaun proibisaun aujénsia tanba kazu arguidu la halai sees hosi prosesu investigasaun.

Denfensór Públiku Sérgio Quintas. Foto/Hatutan.com.

TR konsidera apreensaun ba arguidu nia pasaporte la vale, tanba ne’e husu atu devolve arguidu nia pasaporte.

Alende ne’e, Defensór Públiklu ne’e mós husu ba Ministériu Públiku (MP) liu-liu Prokuradora Titulár Lídia Soares, atu labele uza nia kompeténsia hodi halimar ema seluk nia vida, tanba antes ne’e Prokuradora orienta verbalmente ba Polísia hodi ba kaer arguidu iha aeroportu, halo aprensaun domisialiáriu ba arguidu nia rezidénsia iha Raikotu no prende arguidu nia pasaporte sen mandadu detensaun no apreensaun hosi Tribunál Distritál Díli (TDD).

Antes ne’e, liu hosi primeiru interrogatóriu ne’ebé prezide hosi juiza singulár Ana Paula Fonseca, deside aplika medida koasaun Proibisaun ba Auzénsia ou bandu labele sai ba rai liur ba arguidu Libório Pereira ba krimi partisipasaun ekonómika no negósiu ne’ebé deskonfia atu halai sees hosi prosesu investigasaun ne’ebé la’o hela no TDD mós válida auto apreensaun hosi Polísia hanesan pasaporte no dokumentu sira seluk.

Jornalista: Carmelita Isaac