Komandu F-FDTL Promove tán Membru Na’in 17

Hatutan.com, (03 Fevereiru 2022), Díli—Komandu FALINTIL Forsa Defeza Timor-Leste (F-FDTL), tula tán deviza ba membru hamutuk na’in 17, tanba prienxe ona rekézitu-sira militár nian.

Xefe Estadu Maiór Forsa Armada, Brigadeiru Jenerál Calisto dos Santos “Coliati”, pose hamutuk ho membru sira hafoin serimónia promosaun ne’ebé hala’o iha Kuartél Jenerál, Fatuhada-Díli, Kinta (03/02/2022). Foto/Média F-FDTL.

Promosaun ida-ne’e, hahú hosi klase Sarjentu hamutuk na’in 12, Ofisiais Sub-Alternu iha na’in-tolu, no Ofisiais Superiór iha na’in-rua.

Notisia iha Relasaun:Lú Olo Ezonera Ona Lere husi Xefe Estadu Maiór Jenerál F-FDTL

“Promosaun ne’e normál iha militár. Ida-ne’e rekoñesimentu Komandu ba militár-sira ne’ebé hala’o sira nia karreira tuir ona kritériu, prienxe ona rekezitus, atu bele promove,” Xefe Estadu Maiór Forsa Armada, Brigadeiru Jenerál Calisto dos Santos “Coliati”, hateten hafoin serimónia promosaun ba membru-sira iha Kuartél Jenerál, Fatuhada-Díli, Kinta (03/02/2022).

Promosaun ne’e hanesan kontinuasaun hosi atividade promosaun ne’ebé hala’o ona ba sira antigu liu, iha Kuarta 02 Janeiru.

Ida-ne’e hanesan mós rekoñesimentu ba militár-sira, tuir sira-nia servisu ne’ebé presta durante tempu barak, iha postu ida ne’ebé sira uluk tau.

Xefe Estadu Maiór Forsa Armada, Brigadeiru Jenerál Calisto Santos “Coliati”, tula deviza ba membru sira iha serimónia promosaun ne’ebé hala’o iha Kuartél Jenerál, Fatuhada-Díli, Kinta (03/02/2022). Foto/Média F-FDTL.

“Hanesan uluk, balun Cabo, depois nia tinan hira mak iha direitu atu bele promove, nomos la’ós tanba de’it iha direitu atu promove maibé, tenke haree katak, iha ninia servisu ne’e, ninia komportamentu sira ne’e, tuir karreira militár ne’e. Ho ida-ne’e mak bele fóin promosaun ba sira,” Coliati hateten tán.

Promosaun ba tinan 2022 nian termina ona, bele iha tán promosaun iha faze sira tuir-mai, maibé depende ona ba desizaun hosi Xefe Estadu Maiór Jenerál F-FDTL foun, Tenente Jenerál Domingos Raúl “Falur Rate Laek”.

Maski nune’e, Komandu F-FDTL iha ona planu atu haree no avalia ba unidade forsa navál ninian, ne’ebé mak tuir planu sei prevee atu halo promosaun iha fulan Agostu tinan ne’e.

Promosaun ne’e signifika aumenta tán responsábilidade, aumenta tán servisu ba militár sira ne’ebé promovidu.

Jornalista: Rogério Pereira Cárceres