Kandidatu PUDD, PDRT no Independente Antero Benedito Rejistadu

Hatutan.com (03 Janeiru 2022) Díli—Kandidatu Prezidente Repúblika, Martinho Gusmão rejistadu iha Tribunál Rekursu (TR) ho apoiante 10.000 mai hosi Munisípiu 12 inklui Rejiaun Administrativa Espesiál Oecusse Ambeno (RAEOA), hetan mós apoiu hosi Partidu Unidade Dezenvolvimentu Demokrátiku (PUDD).

Tribunal Rekursu. Foto/Mapio.net 2004.

Rejistu no submisaun dokumentu kandidatu ne’e, submete hosi ekipa susesu ne’ebé lidera hosi Olinda Fernandes Barreto, iha tuku 17:00 otl.

Notisia iha Relasaun:Virgílio Guterres Kompleta Ona Dokumentu no Constâncio Pinto Rejista Mós Hanesan Kandidatu PR

“Ami nia kandidatu Martinho Gusmão rejistadu,” Portavóz ekipa susesu, Olinda Fernandes Barreto hateten hafoin rejistu iha TR, Kinta (03/02/2022).

Maski antes ne’e deklara avansa hanesan kandidatu independente, maibé ikus mai hetan apoiu hosi PUDD.

Iha oras hanesan, kandidatura independente Antero Benedito da Silva mós rejistadu iha TR, hafoin submete dokumentu ho proponente 6.000-resin.

“Ohin ami kompleta ona dokumentus hodi rejistu ami nia kandidatu independe ho apoiantes 5.000-resin,” Portavóz ekipa susesu, Adi Pinto hateten.

Iha oras ikus liu, TR mós simu dokumentu kandidatu Partidu Demokrátiku Republika Timor (PDRT) Anacleto Bento Ferreira ho proponente 6.000-resin.

“Dokumentu ne’ebé ami submete prienxe ona kritériu ho proponente 6.000-resin ne’ebé sei fó apoiu másimu ba ita nia kandidatu ne’e,” Portavós ekipa susesu Matias Borromeu hateten.

Tuir planu, kandidatu PDRT ne’e sei hala’o abertura kampaña iha Munisípiu Bobonaro.

To’o loron 03 fulan Fevereiru 2022, kandidatu hamutuk na’in-17 mak rejistadu iha TR, kompostu hosi kandidatu hosi partidu CNRT, José Manuel Ramos Horta, partidu KHUNTO Armanda Berta dos Santos, Partidu FRETILIN Francisco Guterres Luo-Olo, Partidu PD Mariano Asanami Sabino, Partidu Demokratiku da Republika de Timor (PDRT) Anacleto Bento Ferreira, PUDD Martinho Gusmao, kandidatu independente kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres, Constâncio da Conceição Pinto, Luis Tilman no Antero Benedito da Silva.

Entertantu submisaun no rejistu kandidatura PR iha Tribunál Rekursu ne’e sei remata iha loron aban oras 17:00 otl.

Jornalista: Carmelita Isaac