Razaun Tribunál aplika pena ne’e, tanba konsidera faktus provadu katak arguidu fa’an formuláriu rekolla taxa nian ba ema estranjeiru, inklui Timor oan no osan hirak ne’e balun atu atende servisu imigrasaun no balun arguidu utiliza ba interese privadu maske arguidu nega katak la uza ba interese privadu.
Advertisement
Provadu mós katak, osan hirak ne’e arguidu la depozita ba kofre Estadu, maibé hodi responde fali ba nesesidade servisu hanesan sosa pulsa, enxe mina ne’ebé laiha termu de entrega no resivu no tuir loloos arguidu labele halo tanba kada tinan Governu aloka orsamentu liu hosi Orsamentu Jerál Estadu ba instituisaun ne’e.
Tribunál konsidera arguidu nia justifikasaun katak, durante arguidu rekolla taxa iha portu entrada liu-liu iha Díli, arguidu konsege depozita de’it $1.200 ba kofre Estadu.
Parte Defeza, Jonas Henrique sei ko’alia ho arguidu hodi hatama rekursu ba TR atu hatún pena ne’ebé Tribunál aplika ba nia kliente, tanba arguidu katuas ona.
Antes ne’e, Ministériu Públiku akuza arguidu ba prátika krime pekulatu ne’ebé previstu iha artigu 295 hosi kódigu penál Timor-Leste, relasiona ho rekollamentu taxa ba kofre Estadu iha kada pontu entrada sira hanesan aeroportu Díli, Portu Díli, Batugade, Salele, Aeroportu Suai no Sakato-Oé-Cusse ne’ebé fó prezuizu ba Estadu ho montante $13.200.
Audiénsia julgamentu ne’e prezide hosi juiz koletivu Alvaro M. Freitas, Evangelino Belo, José Gonçalves, MP reprezenta hosi Prokuradora Lídia Soares no arguidu hetan asisténsia legál hosi Defensór Públiku Jonas Hendrique.