Hatutan.com (7 Fevereiru 2022) Díli—Tribunál Rekursu (TR), hahú halo verifikasaun ba dokumentu hosi kandidatu Prezidente Repúblika Períudu 2022-2027, ne’ebé submete ona iha loron 17 fulan Janeiru to’o 04 Fevereiru tinan 2022.
Prazu ba verifikasaun dokumentu ne’e, sei termina iha 14 Fevereiru hodi anunsia kandidatu ne’ebé admitidu.
Notisia iha Relasaun:Horta-Angela-Felisberto ho Milena Submete Ona Dokumentu iha Tribunál Rekursu
“Ami hahú verifika dokumentu kandidatu nian iha prazu loron 10 sura hosi Sábadu loron 05 Fevereiru no ohin tama ona ba loron tolu. Maibé, agora ha’u seidauk bele fó-sai kandidatu ne’ebé nia dokumentu STAE haruka ona mai, tanba dentru de prazu loron 10 maka TR sei anunsia kandidatu ne’ebé mak admitidu no hirak ne’ebé la admitidu,” Prezidente Tribunál Rekursu (PTR), Deolino dos Santos hateten iha knaar fatin, Caicoli, Segunda (07/02/2022).
Hahú iha loron 17 Janeiru to’o loron 04 fulan Fevereiru tinan 2022, TR simu dokumentu hosi kandidatu nain-17, kompostu hosi kandidatu hosi partidu CNRT, José Manuel Ramos Horta, partidu KHUNTO Armanda Berta dos Santos, Partidu FRETILIN Francisco Guterres Luo-Olo, Partidu PD Mariano Asanami Sabino, Partidu Demokratiku da Repúblika de Timor (PDRT) Anacleto Bento Ferreira, kandidatu independente kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres, Constâncio da Conceição Pinto, Luis Tilman, Antero Benedito da Silva no Martinho Germano Gusmão.
Jornalista: Carmelita Isaac