Justisa & Krime

Vendedór Na’in-ida iha Merkadu Taibesi Ba Hatán iha TDD

Published

on

Hatutan.com (07 Fevereiru 2022) Díli-Vendedór na’in-ida ho inisiál JVS, Segunda (07/02/2022), ba hatán iha Tribunál Distritál Dili (TDD) tanba envolve iha krime tentativa omisídiu.

Tribunál Distritál Díli (TDD). Foto/Hatutan.com.

Julgamentu ne’ebé prezide husi juiz koletivu, José Gonçalves, Argentino Nunes no Alvaro Maria Freitas, fó sai katak arguidu JVS tenta lori tudik sona lezadu SC bainhira lezadu   ba sosa sasán iha merkadu Taibesi.

Iha julgamentu kontinuasaun ne’e arguido deklara momentu ne’ebá lezadu nia alin Natalino ba sosa supermi iha merkadu no soke malu ho arguidu tanba ne’e arguidu uza liman hodi dudu Natalino, maibé Natalino hateten, “o jagoan ka, hein ha’u iha ne’e.”

Bainhira arguidu aruma hela sasán fa’an nian atu fila ba uma, derrepente lezadu ho nia kolega sira ba husu arguidu katak ohin, “o maka baku ha’u nia alin ka?”.

Advertisement

Rona lia-hirak ne’e arguidu hatán dehan, lae  tanba ne’e lezadu foti ai pedasuk boot ida baku iha arguidu nia reen-toos no balun lori ho tudik no arguidu hanoin sira atu oho arguidu, tanba ne’e arguidu foti tudik modo ne’ebé nia uza hodi ko’a modo ba fa’an hodi sona arbiru de’it ba lezadu sira, maibé arguidu la hatene tudik ne’e kona se tanba momentu ne’ebá arguidu mós oin halai tanba hetan uluk baku husi lezadu no nia kolega sira.

Hafoin rona arguidu, Tribunál adia hikas julgamentu ba loron seluk hodi kontinua rona lezadu no sasin sira.

Tuir akuzasaun husi MP katak iha loron 23 fulan-Jullu 2016 iha oras 8:00, lezadu sente hamlaha no ba sosa supermi iha Merkadu Taibesi, no arguidu ne’ebé fa’an hela modo hamutuk ho nia kolega sira hemu hela tua-sabu, tanba ne’e bainhira lezadu liuhusi arguidu nia fatin fa’an modo arguidu bolu lezadu hodi husu koñese ha’u ka lae? Lezadu hatán la koñese tanba ne’e arguidu buti lezadu nia kakorok, tuku dala-ida no hasai tudik hodi sona lezadu iha parte kotuk no arguidu halai.

MP akuza arguidu ba pratika krime tentativa omisídiu ne’ebé previstu iha artigu 23 husi kódigu penal Timor Leste.

Jornalista: Carmelita Isaac

Advertisement

Husik Hela Komentariu

Your email address will not be published. Required fields are marked *

Trending

Exit mobile version