Privatiza Kustu Judisiáriu, TDD Julga Ofisiál Justisa Tribunál Distritál Oe-cusse

Hatutan.com (08 Fevereiru 2022), Díli—Tribunál Distritál Díli (TDD), liu hosi juiz kolektivu Maria Solana, Ana Paula Fonseca, Evangelino Belo, hala’o primeiru julgamentu ba krime pekulatu ne’ebé deskonfia involve ofisiál justisa Tribunál Distritál Oecuse (TDO), arguida Zinha Maria Soares, tanba privatiza osan kustu judisiáriu ho montante $250.

Tribunál Distritál Díli. Foto/Hatutan.com.

Iha audiénsia arguida konfesa faktus loos hotu iha akuzasaun, maibé antes ne’e arguida devolve ona osan ne’e liu hosi nia advogadu ho montante $250 ne’ebé hatama diretamente ba Tribunál Rekursu (TR).

“Momentu hatama osan ne’e ha’u nia advogadu mak ba hatama, tanba ha’u moras hela. Maibé, depois devolve osan ne’e ha’u mós hetan sansaun disiplinár,” arguida deklara iha sala julgamentu.

Hafoin rona arguida, Tribunál adi’a hikas julgamentu ba loron seluk, hodi rona sasin no alegasaun.

Antes ne’e, tuir akuzasaun hosi Ministériu Públiku (MP) katak, iha loron 05 fulan Abril 2019, Tribunál Distritál Díli, foti desizaun ba kazu Krime pekulatu, inklui deside kustu judisiáriu ho montante $250 no iha loron ne’e kedan entrega osan ba arguida hanesan kustu judisiáriu nian.

Tanba momentu ne’ebá arguida hanesan ofisiál justisa iha TDD, maibé osan ne’e arguida la depozita ba kofre Estadu hodi utiliza ba nesesidade privada, tanba ne’e MP akuza arguida ba prátika krime pekulatu ne’ebé previstu iha artigu 295 hosi kódigu penál TL.

Audiénsia julgamentu iha Tersa 08 fulan ne’e prezide hosi juiz kolektivu, Maria Solana, Ana Paula, Evangelino Belo no Ministériu Públiku reprezenta hosi Prokuradór Domingos Gove Barreto no arguida hetan legál hosi Defensór Públiku, Fernando da Costa.

Jornalista: Carmelita Isaac