Polítika
Rezolusaun IV Konferénsia Nasionál OPMT, Haforsa Disiplina Institusionál FRETILIN
Hatutan.com (13 Fevereiru 2022) Díli— IV Konferénsia Nasionál Organizasaun Populár Mulher Timor (OPMT) prodús rezoluasaun ida haforsa disiplina Institusionál Partidu FRETILIN.
IV Konferénsia Nasionál OPMT, hala’o iha Salaun São José Katedrál Vila-Verde, hosi loron 11 to’o 13 Fevereiru 2022. Foto/OPMT.
OPMT/IV-CN/Rezolusaun n°5 / 11- I3 fevereiru /2022 Rezolusaun haforsa disiplina institusionál partidu FRETILIN refere ba re-kandidatura Francisco Guterres Lú Olo ba Prezidente Repúblika 2022- 2027.
IV Konferénsia Nasionál OPMT, hala o iha Salaun São José Katedral Vila Verde, hosi loron 11 to’o 13 fevereiru 2022, hafoin haree ba:
Artigu 90°, Estatutu FRETILIN ne’ebé:
- a) Define OPMT nu’udár organizasaun-de-masas partidu nian no feto FRETILIN nian ne’ebé estrutura-an demokrátikamente atu promove igualdade entre feto no mane iha área polítika, ekonómika, kulturál, sosiál no familiár;
- b) Hatuur katak OPMT iha autonomia organizativa no finanseira, ho respeitu ba estatutus, deklarasaun prinsípius, manuál no programa polítikus FRETILIN;
- c) OPMT iha liberdade asaun no iha estatutus no regulamentu rasik, ho respeitu ba mós orientasaun polítika jerál hatún hosi órgaun kompetente FRETILIN.
Nune’e:
Ho dever tomak atu haktuir orientasaun hosi órgaun superiór partidu ne’ebé fó-sai ona hanesan tuir mai:
1) Deklarasaun públika hosi Sekretáriu-Jerál partidu FRETILIN , Mari Alkatiti, ne’ebé fó apoiu tomak ba re-kandidatura Francisco Guterres Lú Olo ba Prezidente Repúblika 2022-2027, ho data 16 Janeiru 2022;
2) Rezolusaun hosi Komisaun Polítika Nasionál FRETILIN ne’ebé haforsa Deklarasaun hosi Sekretáriu-Jerál partidu FRETILIN ho data 28 Janeiru 2022;
3) Orientasaun hato’o rasik hosi Sekretáriu-Jerál no Prezidente Interinu partidu FRETILIN, Mari Alkatiri, iha IV Konferénsia Nasionál, katak:
OPMT ne’e organizasaun-de-massas FRETILIN nian, tanba ne’e, OPMT tenke hatutan valores no prinsípu FRETILIN nian, tenke hatene disiplina institusionál FRETILIN nian.
“Iha ámbitu disiplina institusionál, Sekretáriu no Prezidente Interinu FRETILIN hatete katak, FRETILIN deside ona apoia kandidatu ida de’it ba eleisaun prezidensiál tuir mai mak Francisco Guterres Lú Olo,” Hatutan.com sita Komunikadu.
IV Konferénsia Nasionál OPMT, ho Prezidente meza Guilhermina Ribeiro ho kbiit hosi estatutu OPMT no dever atu haforsa disiplina instititusionál, deside fó apoiu totál no inkondisionál ba kandidatu Francisco Guterres Lú Olo ba Prezidente Repúblika 2022-2027.
Atu garante susesu ba re-kandidatura hosi Francisco Guterres Lú Olo, IV Konferénsia Nasional OPMT:
– Hatún orientasaun ba membru hotu-hotu OPMT atu hala’o de’it atividades ne’ebé halo parte kampaña hosi ekipa susesu no kandidatu Francisco Guterres Lú Olo no tuir programa partidu FRETILIN nian;
– Hatún orientasaun ba membru ida-idak OPMT atu dada tama, pelu menus, Buibere na’in-rua tán ba OPMT/FRETILIN to’o 17 Marsu 2002, atu nune’e hasa’e númeru votantes a favór kandidatu Lú Olo atu manán iha primeira volta eleisaun prezidensiál, iha 19 Marsu 2022.
Jornalista: Vito Salvadór