Pré-Kampaña, CNE Sei Aplika Sansaun Administrativa ba Kandidatu PR no Parpól

Hatutan.com (15 Fevereiru 2022) Díli—Comisaun Nacional das Eleiçŏes (CNE) konsidera Partidu Polítiku (Parpol) no kandidatu Prezidente Repúblika ne’ebé halo ona pré kampaña, viola lei tanba loron kampaña sei hahú iha loron 2 to’o 16 fulan Marsu 2022.

Edifísiu CNE Nasionál Caicoli, Dili. Foto/Hatutan.com.

Tanba ne’e, bainhira iha keixa, CNE sei rejista hodi deside aplika sansaun administrativu.

Notisia iha Relasaun:Kalendáriu Eleitorál ba Eleisaun Prezidente Repúblika 2022

“Bainhira partidu politiku ka kandidatu balun halo ona pré kampaña, signifika viola lei tanba bainhira PR dekreta eleisaun Prezidensiál iha ne’ebá mós fó-sai katak, iha loron 2 to’o 16 fulan Marsu mak foin bele halo kampaña no fora hosi loron ne’e signifika viola lei. Maibe tenki iha ema ruma aprezenta keixa mai CNE ka STAE,” Vise Prezidente CNE, Domingos Barreto hateten ba Hatutan.com, hafoin abertura semináriu nasionál ho tema Papél Partidu Politiku hodi prevene no kombate korrupsaun iha TL, iha salaun CNE Tersa (15/02/2022).

Sansaun rua ne’ebé CNE sei aplika, primeiru maka sansaun administrativu ne’ebé sei haruka karta administrativu ba kandidatu ka partidu politiku ne’ebé viola hodi fó-hanoin no labele halo tán, maibé bainhira repete maka komete fali krime dezobediénsia tanba la halo tuir.

Bainhira komete ona krime dezobediénsia maka tenki tuir prosesu normál ne’ebé liga ho kódigu penál artigu 299.

Durante kandidatura rejistu iha TR to’o agora hosi parte CNE seidauk simu keixa kona-bá pré-kampaña hosi kandidatura no partidu polítiku sira.

Jornalista: Carmelita Isaac