Xefe Estadu Maiór Pedro Klamar Fuik Mantein Diretór IDN

Hatutan.com, (15 Fevereiru 2022), Díli- Xefe Estadu Maiór Jenerál FALINTIL-Forsa Defeza Timor Leste, Tenente Jenerál Domingos Raul “Falur Rate Laek”, afirma katak Xefe Estadu Maiór Forsa Armada,  Comodoro Donanciano Costa Gomes Pedro “Klamar Fuik” mantein asume responsabilidade nudár diretór Institutu Defeza Nasional (IDN) hodi hein nomeiasaun ba diretór foun.

Notísa iha Relasaun: Coliati Asume Vise Xefe Estadu Maiór Jenerál, Klamar Fuik ba Xefe Estadu Maiór

Xefe Estadu Maiór, Comodoro Donanciano Costa Gomes Pedro “Klamar Fuik” . Foto/Dok.IDN

“Dupla funsaun ne’e di’ak hela ita mak hatene jere,” Tenente Jenerál Domingos Raul “Falur Rate Laek” hateten  ba jornalista sira iha Palásiu prezidensiál Bairru-Pité, Dili, Tersa (15/02/2022).

Tenente Jenerál Falur Rate Laek sei tetu no deside figura ida ho méritu no iha kapasidade jestaun hodi bele asume responsabilidade nudár diretór IDN tuir lei haruka.

Xefe Estadu Maiór, Comodoro Donanciano Costa Gomes Pedro “Klamar Fuik” rasik hateten, se karik iha konjugasaun ba esforsu lideransa ba iha kualkér instituisaun tamba nesesidade nia hanoin bele tamba situasaun atuál Timor Leste nian  iha limitasaun barak, maibé  prepara nafatin rekursu hotu iha ba kontinuidade instituisaun nian.

“Ita prepara rekursu ba fó kontinuidade ba sustentabilidade Estadu no ida ne’e mais importante.” Klamar Fuik hateten.

Xefe Estadu Maiór ne’e reforsa iha ierarkia instituisaun, iha kandidatu potensial ne’ebé merese ona atu lidera IDN, nune’e superiór sira mak sei tetu ho desizaun rasik kabe ba kuadru orgánika IDN nian. IDN hanesan instituisaun autónoma finanseira no patrimóniu rasik  tuir nia estatutu no Lei haruka.

Jornalista: Vito Salvador