Justisa & Krime
LS Kumpre Aprezentasaun Periódika Tanba Lori Tudik Movimentu iha Manleuana
Hatutan.com (17 Fevereiru 2022), Díli—Tribunál Distritál Díli (TDD) iha Kinta 17 fulan ne’e liu hosi primeiru interrogatóriu ne’ebé prezide hosi juiz Evangelino Belo, deside aplika medida koasaun aprezentasaun periódika ba arguidu ho insiál LS ba krime arma branka, tanba utiliza tudik hodi halo movimentu iha área suku Manleuana, postu administrativu Dom Aleixo, munisípiu Díli.
Tribunál esplika ba arguidu katak, arguidu sei aprezenta an kada semana iha postu Polisia ne’ebé besik.
Razaun Tribunál aplika medida koasaun ne’e, tanba laiha indisius forte hodi lori arguidu ba prizaun preventiva no hodi asegura arguidu nia prezensa durante prosesu investigasaun.
Antes ne’e, iha arguidu nia hela fatin Manleuana, arguidu kaer tudik hodi halo movimentu iha área ne’e, tanba ne’e bainhira PNTL halo patrullamentu hetan no detein arguidu durante oras 24 hafoin submete ba primeiru interrogatóriu.
Audiénsia julgamentu ne’e prezide hosi juiz singulár Evangelino Belo, MP reprezenta hosi Prokuradór Reinato Berenahak no arguidu hetan asisténsia legál hosi Defensór Públiku (DP) João Carvalho.
Jornalista: Carmelita Isaac