Dezenvolvimentu Komponente CFT Depende ba Disiplina Militár

Hatutan.com, (19 Fevereiru 2022), Díli—Xefe Estadu Maiór FALINTIL Forsa Defeza Timor-Leste (F-FDTL), Comodoro Donaciano da Costa Gomes “Pedro Klamar Fuik”, husu ba dirijente, ofisiais no membru sira iha Komponente Centro de Formasaun e Treino (CFT) Metinaro, atu mantein nafatin disiplina militár ne’ebé inisia dezde uluk to’o ohin, nune’e bele prosesa no  dezenvolve instituisaun ne’e ba oin ho di’ak liu tán.

Xefe Estadu Maiór, Comodoro Donanciano Costa Gomes Pedro “Klamar Fuik” . Foto/Dok.IDN

Pedro Klamar Fuik hato’o asuntu ne’e, bainhira reprezenta Xefe Estadu Maior Jenerál F-FDTL, Domingos Raúl “Falur Rate Laek”, iha serimónia aniversáriu Komponente CFT, Komandante Nicolau Lobato, ba dala-21, iha Postu Administrativu Metinaro, Munisípiu Díli. 

“Ohin, 19 de Fevereiru 2022, ita komemora loron CFT nian ba dala 21. Ha’u nia dezezu sentru de instrusaun, komponente de formasaun e treina ne’e, hala’o nafatin kna’ar ne’ebé iha ona ho di’ak liután, mantein kultura, tradisaun, ábitu ne’ebé mak di’ak, ne’ebé mak dezenvolve dezde prinsípiu to’o agora, no sira halo di’ak liu teb-tebes. Ida-ne’e presija halo di’ak liután atu hametin iha prosesu de transformasaun, forsas armadas,” Comodoro Pedro Klamar Fuik, hateten ba jornalista sira iha Metinaro-Díli, Sábadu (19/02/202).

Diretór IDN ne’e haktuir, foufoun komponente Centro de Formasaun e Treino, inisia ho naran Sentru de Instruçăo do Comandante Nicolau Lobato.

Sentru ida ne’e hari’i atu dezenvolve Timor-Leste nia membru forsa armada nian ne’ebé mak haree liu bá formasaun sira militár nian.

Bazikamente, hala’o formasasaun sira kona-bá hametin karáter no valór sira hanesan ema militár nian, no halo oinsá mak membru sira bele hahú vida militár ida ho profisionalízmu.

Hafoin tinan 21, iha komandante barak mak sai ona komandante iha Sentru de Instrusaun, ka Komponente de Sentru Formasaun e Treino.

Iha primeira lideransa, lidera hosi Jenerál reformadu Taur Matan Ruak, atuál Primeiru Ministru (PM) RDTL, tuir fali mak nia duni (Klamar Fruik), no daudaun ne’e komandante “Haksolok” mak lidera hela.

Bainhira vizita fila-fali Komponente CFT Metinaro, komandante “Klamar Fuik” sente onradu, tanba liuhosi fatin ida ne’e mak hahú TL  nia transformasaun de forsa FALINTIL, ba FDTL, ne’ebé lidera hosi Jenerál Taur Matan Ruak.

“Komandu tomak, mai eskola iha fatin ida ne’e, atu sai hanesan sentru de instrusaun, no tau naran Komandante Nicolau Lobato. Ha’u mós hetan kna’ar, komanda sentru de instrusaun ne’e, ba dala-rua. Mai ha’u, konstitui onra ida ba ha’u, fila-fali mai iha fatin ida ne’e, depois de tinan barak haree fatin ida ne’e sai sidade ida, no fatin ida ne’e, mantein tradisaun militár nian ne’ebé  di’ak teb-tebes atu dezenvolve ita nia forsas armadas,” Comodoro “Klamar Fuik” hateten tán.

Iha fatin hanesan, komandante Komponente CFT, Tenente Coronel, Cesário Salustiano “Haksolok” haktuir katak, nia hahú lidera Komponente CFT Nicolau Lobato, Metinaro ne’e iha 02 Setembru 2019.

Ho mandatu ba tinan rua ona fó nia kongratulasaun ba estrutura tomak iha Komponente CFT nian, tanba durante ne’e hatudu kontribuisaun servisu hamutuk ne’ebé di’ak tebes.

“Nu’udár komandante CFT hahú 2019. Kuandu ha’u mai, ha’u hateten ba sira katak, ha’u bele ka la’e. Sé ha’u mesak, ha’u labele. Sé ha’u ho ha’u nia estrutura tomak, ha’u sei bele lori komponente ida ne’e ba oin. Maka, durante ha’u nia mandatu, agora realiza ona ba dala-tolu, buat hotu-hotu la’o ho di’ak,” Tenente Coronel “Haksolok”, dehan.

Komponente CFT  iha ninia dever ida maka forma ema sai ema no eduka ema sai ema ne’ebé edukadu. Maibé, nu’udár lideransa másimu iha komponente ne’e, dala-ruma sempre hasoru difikuldade oioin. Sa-tán, komponente CFT sai hanesan abut ida ba instituisaun F-FDTL.

“Tanba ne’e maka durante mandatu tinan-rua nia laran, preokupasaun boot tebtebes, parte formasaun ba ema, kona-bá infra-estrutura, kona-bá buat seluk tán ne’ebé ita boot sira hatene nanis. Ne’ebé, atu forma ema, sai ema, ne’e la’ós fásil,” Tenente Coronel “Haksolok”, informa.

Atu hatán ba politika Governu nian, liuhosi Ministériu Defeza (MD), ne’ebé planeadu atu rekruta tán membru foun F-FDTL hamutuk na’in 600 iha 2022 nia laran, maka estrutura tomak komponente CFT nian, liuhosi ekipa Batallaun de Formasaun nian, oras-ne’e prepara hela referénsia ba kursu nian balun, hodi hatán ba polítika rekrutamentu ne’e.

“Karik governu aseita atu halo inkorporasaun iha fulan Agostu nia laran, prontu ami preparadu atu fó hanorin matéria saida de’it ba sira,” komandante “Haksolok” afirma tán.

Seidauk Iha Órden Kolokasaun Membru Foun

Maske membru F-FDTL hamutuk nain 598 ne’ebé rekrutadu, tuir ona juramentu ba bandeira nasionál RDTL, maibé to’o oras ne’e, komandante “Haksolok” seidauk simu órden ka orientasaun ruma hosi Xefe Estadu Maior Jenerál no Kuartél Jenerál (J1) ninian, tanba sira mak iha liu kompeténsia.

“Loloos, tuir ami nia lei interna ne’e depois de juramentu bandeira ne’e, komesa fahe ona. Maibé, to’o agora Estadu Maior Forsas armadas, seidauk iha orden ruma ba ha’u. Foin daudaun vizita Jenerál Falur Rate Laek ninian, dehan katak, ha’u asegura sira, hein órden. Ne’ebé bainhira mak fahe ne’e, kompeténsia Estadu Maior ho J1 ninian,” Tenente Coronel “Haksolok” esplika.

Bazeia ba Komponente CFT nia proposta ba komandu F-FDTL, tuir estatutu foun ne’ebé iha katak, membru foun sira ne’e, bainhira koloka tán ba iha Komponente CFT, maka nia númeru efetivu sei bele atinje to’o 301. Maibé, tanba seidauk halo distribuisaun, ho nune’e maka daudaun ne’e membru efetivu iha Komponente CFT rasik, sei menus.

Haktuir ba diretiva Governu nian, liuhosi MD katak, membru foun sira ne’e, sei distribui 240 ba Primeiru Batallaun iha Baucau. Na’in 240 ba Komponente Navál, no na’in 30 ba Polisia Militár, inklui balun sei destaka ba iha Enjeñeria no Unidade Espesiál ninian.

“Agora daudaun mós ita fó prioridade enjeñeria. Tanba agora enjeñeria, kuaze espalla iha nivel nasionál. Sé karik ha’u hetan, dala-ruma ema ida, ema-rua. Mais atu hetan 20 to’o 30 ba leten, seidauk iha,” Komandante “Haksolok” hateten tán.

Komandu F-FDTL, kompostu hosi Komponente Centro de Formaçăo e Treino (CFT), Komponente Navál, Komponente Terrestre, no Unidade Polisia Militár (PM), ho Unidade FALINTIL (J1) ninian.

Jornalista: Rogério Pereira Cárceres