MEJD Seidauk Responde Pedidu Harii Morru Protesaun ESJ Filiál Laga

Hatutan.com, (21 Fevereiru 2022), Díli—Maski dirijente Eskola Ensinu Sekundária Jerál (ESJ) Filiál Laga, hato’o beibeik pedidu formál ba Ministériu Edukasaun Juventude no Desportu (MEJD), atu harii morru protesaun hale’u eskola, tanba durante ne’e estudante sira la seguru, maibé to’o oras-ne’e seidauk iha resposta.

Eskola Ensinu Sekundária Jerál (ESJ) Filiál Laga. Foto/Hatutan.com.

Diretór Eskola Sekundária Jerál Filiál de Laga, Ernesto Modesto Castro informa, eskola ne’e harii iha 2013 to’o ohin loron, nakloke de’it, tanba seidauk iha morru atu proteje ambiente no mós kondisaun infra-estrutura sira eskola nian.   

Bainhira tempu intervallu, estudante sira barak mak hakarak halai sai ba liur, tanba besik kedan iha estrada públiku.

Situasaun ida-ne’e, bele lori ameasa ba estudante sira nia vida, tanba movimentu karreta hosi diresaun Lospolos ba mai kapitál Díli makas.

“Durante ne’e eskola nakloke de’it tanba seidauk iha morru no besik liu estrada. Loloos, ida-ne’e ami planeia ona, depois ami hato’o tán ona, maibe buat ne’e seidauk iha realidade,” Diretór Eskola Sekundária Jerál Filiál Laga, Ernesto Modesto Castro, informa iha kna’ar fatin Postu Administrativu Laga Vila, Segunda (21/02/2022).

To’o oras ne’e MEJD seidauk responde pedidu ne’e, dala-ruma tanba pedidu hosi fatin seluk mós barak liu-liu eskola sira iha Munisipiu Baucau rasik, barak mós mak kondisaun aat ona.

Maski nune’e, governu presija ho urjentemente hadi’a lalais morru protesaun iha eskola ne’e.

Problema seluk tán ne’ebé professór sira enfrenta maka, edifísiu ba professór sira ladún dignu, tanba okupa de’it sala ida ho kondisaun ne’ebé kloot tebes no labele akumula hotu mestre no mestra sira.

Eskola ne’e seidauk iha bibioltéka ne’ebé di’ak, tanba livru ka manuál hanorin nian ne’ebé durante ne’e professór sira uza, la ordena ho didi’ak tanba laiha armáriu espesífiku ruma.

Kona-bá bee moos durante ne’e funsiona ho di’ak, maibé depende mós ba ahi eletrisidade. Bainhira ahi mate, maka estudante ho manorin-na’in sira, labele asesu ba bee moos.

Eskola ne’e hetan mós apoiu hosi ONG Internasionál World Vision, kona-bá fasilidade sira sanitária nian, ne’ebé bele fasilita estudante sira bele enxe bee no fase liman, hodi prevene aan hosi virus Covid-19. 

Totál estudante iha eskola sekundária públiku ne’e hamutuk 336 ho profesór na’in-13, nu’udár funsionáriu públiku, no iha na’in-haat mak oras-ne’e sei hanorin ho voluntáriu.

Jornalista: Rogério Pereira Cárceres