Desportu
Federasaun Arte Marsiál Sira Seidauk Kompleta Dokumentus
Hatutan.com, (23 Fevereiru 2022), Díli—Confederação Desporto Timor-Leste (CDTL) husu ba Federasaun Arte Marsiál hotu-hotu ne’ebé hamahan-an iha Konfederasaun atu kompleta rekezitu legál sira tuir diploma ministeriál kona-bá utilidade públika desportiva.
Vise Prezidente CDTL, Zeferino Viegas Tilman. Foto/Hatutan.com.
Iha diploma nú. 48/2017, ne’ebé ko’alia Kona-bá utilidade públika desportiva ezije atu kada federasaun arte marsiál ne’ebé prátika desportu presija kompleta rekijitu hotu-hotu hodi bele hetan legalidade hosi Ministériu Justisa nu’udár federasaun pratikante desportu legál.
Tanba ne’e, liu hosi reuniaun ne’e CDTL ho Federasaun Arte Marsiál sira halo rezumu ba dokumentu importante sira hanesan diploma ministeriál kona-bá utilidade públika desportiva ezije hanesan federasaun sira tenke iha estatutu, iha asosiasaun iha munisípiu, iha atleta, treinadór, árbitu no tenke iha asembleia ka kongresu hodi eleze estrutura tuir estatutu haruka.
Ho ida ne’e maka reuniaun ne’e atu buka hatene situasaun no kondisaun Federasaun Arte Marsiál sira nian kona-bá sira nia priensimentu ba diploma ministeriál utilidade públiku desportiva nian, liuliu dokumentu importante sira ne’ebé presija federasaun sira tenke prienxe.
“Hafoin CDTL halo avaliasaun ba federasaun sira, ohin konsege bolu sira atu kompleta dokumentu,” Vise Prezidente CDTL, Zeferino Viegas Tilman hateten ba jornalista sira iha sede CDTL, Colmera, Kuarta (23/02/2022).
CDTL la halo separasaun ba federasaun sira atu grupu federasaun Arte Marsiál ou federasaun naun kontaktu fíziku sira, maibé CDTL tenta atu federasaun hotu-hotu tenke kumpri lei utilidade públiku desportiva.
CDTL prontu atu kontinua tau-matan nu’udár mahon ida hodi apoiu federasaun hotu-hotu atu hakat ba oin.
Prezidente federasaun Silat Timor-Leste Noé Gaspar Pinto da Silva. Foto/Hatutan.com.
Iha parte seluk, Prezidente federasaun Silat Timor-Leste Noé Gaspar Pinto da Silva konsidera, soru-mutu ho CDTL ho nia objetivu atu konfederasaun bele haree besik liután federasaun sira nia situasaun no kondisaun reál ne’ebé iha, hodi kontribui ba dezenvolvimentu desportiva iha Timor Leste.
Iha sorumutu ne’e CDTL mós husu atu kada federasaun bele hadi’a di’ak liután nia dezempeñu servisu hodi prepara atleta atu ba partisipa iha eventu hotu-hotu tuir oportunidade ne’ebé federasaun iha.
Federasaun arte marsiál hotu-hotu ne’ebé hamahan-an iha CDTL iha obrigasaun atu atualiza ninia progresu federasaun nian nune’e CDTL nafatin informadu ho dezenvolvimentu federasaun nian, hodi garante nafatin sustentabilidade federasaun nian bainhira iha konvite atu partisipa iha eventu nasionál no internasionál.
Federasaun arte marsiál sira ne’ebé ohin partisipa iha sorumutu ho CDTL mak hanesan, federasaun Taekwondo, federasaun Karatedo, federasaun Kempo, federasaun Judô, federasaun Aikido, federasaun Mauthay, federasaun Silat, federasaun Boxing no Wushu.
Jornalista: Vito Salvadór