NS Halo Violasaun Seksuál Hasoru JC ho Moras Mentál to’o Isin-rua

Hatutan.com, (23 Fevereiru 2022), Díli—Tribunál Distritál Díli (TDD) liu hosi juiz kolektivu Alvaro Maria Freitas, José Gonçalves, Argentino Nunes hala’o primeiru julgamentu ba krime violasaun seksuál ne’ebé deskonfia komete hosi arguidu ho inisiál NS, hasoru lezada JC ho kondisaun moras mentál no defisiente fízika desde ki’ik.

Foto Ilustasarun Google.

Audiénsia julgamentu iha Kuarta loron 23 fulan ne’e, arguidu NS rekoñese nia aktu ne’e no hakarak responsabiliza hodi tau-matan ba nia oan mane ne’ebé ho idade tinan haat ho balun ona, tanba bainhira lezada partus, arguidu ba foti kedan nia oan no hela ho arguidu to’o agora.

Hafoin rona arguido, Tribunál adi’a hikas julgamentu ba loron seluk hodi kontinua rona sasin sira.

Antes ne’e, tuir akuzasaun ne’ebé iha katak, iha loron 20 fulan Agostu tinan 2016 kuaze tuku 14:30 iha suku ida iha Likisá, arguidu komete aktu violasaun seksuál ne’e hasoru lezada ne’ebé ikus liu rezulta lezada isin-rua.

Tanba ne’e, MP akuza arguidu ba prátika krime abuzu seksuál ba ema ne’ebé labele rejiste ne’ebé previstu iha 179 hosi kódigu penál TL.

Audiénsia julgamentu ne’e prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór José Elo no arguidu hetan asisténsia legál hosi advogadu privadu.

Jornalista: Carmelita Isaac