Saúde

Korea Oferese Rapid Antigen Test Kits 50.000 ba TL

Published

on

Hatutan.com, (25 Fevereiru 2022), Díli—Organizasaun Mundiál Saúde (OMS) entrega ona rapid antigen test kits ba Timor-Leste (TL) ne’ebé hetan apoiu hosi Korea International Cooperation Agency (KOICA).

Serimónia entrega rapid antigen test kits hosi Organizasaun Mundiál Saúde (OMS) ba Timor-Leste (TL) ne’ebé hetan apoiu hosi Korea International Cooperation Agency (KOICA), Sesta (25/02/2022. Foto/MS.

Embaixadór Repúblika Korea iha Timor-Leste, Kim Jeong Ho, kontente tebes tanba bele apoia TL iha situasaun difísil.

Notisia iha Relasaun:Governu Simu Millaun $7,86 Hosi KOICA ba Melloramentu Saúde iha TL

“Ami kontente tebes hodi fó apoiu ba Ministériu Saúde ne’ebé serbisu makaas atu kontinua mantein nasaun seguru iha tempu difísil ida-ne’e”, Embaixadór Kim hateten.

Advertisement

Kim haree katak TL serbisu makás hodi kontrola pandemia ida ne’e no hein katak ho kontribusaun hanesan ohin ne’e bele haforsa no halo lais liu tán progresu atu fila ba moris normál.

KOICA no OMS fó apoiu ona Ministériu Saúde ho susesu iha implementasaun programa Integradu ba eliminasaun no kontrola moras NTD dezde tinan 2016.

Liu hosi esforsu hamutuk hirak-ne’e nune’e mós ho lideransa ne’ebé forte hosi Governu, eliminasaun moras LF, kontrolu STH, no interupsaun transmisaun moras framboezia hanesan problema saúde públiku – Timor-Leste besik ona atinji.

Bainhira SARS-CoV-2 ne’e hahú hada’et iha Timor-Leste, OMS serbisu hamtuuk ho KOICA ho lalais re-aloka no mobiliza rekursu ne’ebé iha hodi bele fó apoiu másimu ba Governu Timor-Leste iha luta konta pandemia ida ne’e.

Hanesan parte ida hosi esforsu hamutuk ida ne’e, KOICA no OMS fó ona doasaun kama médiku 100, no kama 500 ba fasilidade izolamentu no tratamentu. Dala ida tán, OMS no KOICA hamutuk fó apoiu ba Timor-Leste liuhosi apoiu test kit 50.000.

Advertisement

“Lori Ministériu Saúde no povu Timor-Leste nia naran, ha’u hakarak espresa ha’u nia apresiasaun no gratidaun hodi kontinua no konsidera fó apoiu hodi responde ba Covid-19 iha TL,” Diretora Jerál Prestasaun Serbisu Saúde, Ministériu Saúde, Odete da Silva Viegas hateten.

Nune’e mós Reprezentante OMS, Arvind Mathur hateten, atu kombate surtu Omicrona entidade hotu presija servisu makaas no servisu koletiva.

“Kazu surtu Omicron ne’ebé foin lalais aumenta makaas ne’e, fó alerta mai ita dala ida tán atu serbisu makaas hodi kombate virus ida ne’e,” nia hateten.

Teste RDT 50.000 ne’e ajuda hodi halo identifikasaun ba kazu no izolamentu kazu Covid-19 liu hosi hasa’e kapasidade ba teste Covid-19 no bele mós utiliza hanesan instrumentu prinsipál atu halo detekta kazu iha área rurál, no área remotas.

Marka prezensa iha serimónia entrega ne’e mak Diretora Jerál Prestasaun Serbisu Saúde, Odete da Silva Viegas, Embaixadór Repúblika Korea iha Timor-Leste, Kim Jeong Ho, Diretora KOICA, Eunju Cha no Asesór Politika Saúde OMS, Vinay Bothra.

Advertisement

To’o loron Fevereiru 24, númeru totál kazu Covid-19 iha Timor-Leste to’o ona 22.528, hosi totál halo teste ba Covid-19 hamutuk 247.440. Kazu lor-loron kontinua aumenta iha fulan Fevereiru nia laran ne’ebé relata kazu 100 kada loron.

Jornalista: Vito Salvadór

Husik Hela Komentariu

Your email address will not be published. Required fields are marked *

Trending

Exit mobile version