Nova Zelándia Sei Apoia Polisiamentu Komunitária Durante Tinan Tolu

Hatutan.com, (25 Fevereiru 2022), Díli—Vise Ministru Interiór, António Armindo hala’o enkontru ho Embaixadór Nova Zelándia Philip Hewitt, diskute kona-bá kooperasaun ho Ministériu Interiór hodi haree ba seitór seguransa liu-liu dezenvolve Polísia Nasionál Timor-Leste (PNTL) espesifikamente Polísia Komunitária iha tinan tolu nia laran.

Vise Ministru Interiór, António Armindo hala’o enkontru ho Embaixadór Nova Zelándia Philip Hewitt, Sesta (25/02/2022). Foto/MI.

“Ita haree hamutuk kooperasaun entre nasaun rua liu-liu liga ba programa Polisiamentu Komunitária ne’ebé Nova-Zelándia atu fó apoiu komesa hosi tinan 2022 to’o 2025. Diskusaun ida-neé atu haree liu prioridade ne’ebé importante iha Polisiamentu Komunitária nia laran,” Embaixadór Philip Hewit, hateten hafoin enkontru ho Vise Ministru Interiór iha Vila-Verde, Sesta (25/02/2022).

Governu Nova-Zelándia iha komitmentu boot ba seitór seguransa iha Timor-Leste, hodi kontinua apoia Polisiamentu Komunitária.

Vise-Ministru Interiór, António Armindo agradese ba tulun ne’ebé durante ne’e Timor-Leste hetan hosi Nova Zelándia, tanba kontinua apoia Guvernu Timor-Leste iha seitór seguransa nian.

“Agradese ba Guvernu Nova-Zelándia liu hosi Embaixadór iha Timor-Leste ne’ebé esforsu nafatin hodi apoia Governu TL iha área segurasa nian. Ita hatene katak, durante tinan 20 nia laran sira nafatin dezenvolve programa kooperasaun ne’ebé foka liu ba polisiamentu komunitária,”  nia hateten.

Nova-Zelándia asina ona akordu hodi fornese fundu ba Fundasaun Ázia ka The Asia Foundation atu kontinua servisu hamutuk ho PNTL hodi hadi’a setór seguransa iha TL liu hosi lansamentu Planu Asaun Munisípal ba PNTL ne’ebé sai hanesan instrumentu importante ida ba Komandante Munisípiu sira atu kontinua integra Polisiamentu Komunitária nu’udár medida preventiva ida nomós hakbesik an iha komunidade.

Jornalista: Vito Salvadór