Polítika
Prezidente Repúblika Sei Férias Hosi 28 Fevereiru to’o 16 Marsu 2022
Hatutan.com, (25 Fevereiru 2022), Díli—Prezidente Repúblika (PR), Francisco Guterres Lú Olo, sei foti férias anuais loron sanulu resin rua, hahú hosi loron 28 Fevereiru t’o 16 Marsu 2022.
Prezidente Repúblika (PR), Francisco Guterres Lú Olo. Foto/Média PR.
Tuir Estatutu Titulares Órgauns Soberania, númeru 4 artigu 10, Lei n°7/2007, 25 jullu altera hosi Lei n°7/2017, 26 Abril, tinan-tinan, titular no membru órgaun soberania sira iha direitu ba períodu férias loron 30.
Notisia iha Relasaun:Kalendáriu Eleitorál ba Eleisaun Prezidente Repúblika 2022
“Maibé, tanba motivu servisu, tinan-tinan Prezidente Repúblika, Francisco Guterres Lú Olo la hasai férias tuir lei determina,” Hatutan.com sita komunikadu hosi Palásiu Prezidensiál Nicolau Lobato, Sesta (25/02/2022).
Liuhusi karta ho data 21 Fevereiru 2022, Prezidente Repúblika informa ba Prezidente Parlamentu Nasionál katak sei goza férias iha 28 fevereiru no mós iha loron úteis husi 1 to’o 16 marsu 2022, iha territóriu nasionál.
Tanba Prezidente Repúblika órgaun unipesoál (ema ida de’it mak kaer), nia sei hala’o nafatin ninia knaar tuir Konstituisaun haruka durante períodu férias ne’e.
Jornalista: Vito Salvadór