Justisa & Krime
Involve Sunu-Uma iha Liquiça, Arguidu Na’in-rua Hatán iha TDD
Hatutan.com, (28 Fevereiru 2022), Dili-Tribunal Distritál Dili (TDD), Segunda (28/02/2022), liu husi juiz koletivu Alvaro Maria Freitas, José Gonçalves, Argentino Nunes, hala’o primeiru julgamentu ba krime danu ho violénsia ne’ebé deskonfia involve maun-alin arguidu PS ho NS.
TDD. Foto/Hatutan.com
Arguidu maun-alin ne’e nudár membru arte-marsiál hamutuk ho sira-nia maun-alin balun tan sunu uma no halo violénsia hasoru lezadu Constâncio Costa no Cornelio da Costa iha Suku Dato Munisípiu Liquiça.
Iha audiénsia julgamentu arguidu NS hili nia direitu nonook hodi lakohi fó nia deklarasaun ba Tribunál, tanba ne’e arguidu PS deklara ba Tribunál katak la’ós nia parte maka halo problema ho lezadu, maibé nia motorista ne’ebé soke malu iha merkadu no arguidu nia motoris hetan baku to’o ran sai.
“Ha’u la ba iha lezadu nia uma iha Hatukesi, tanba la’ós ha’u maka halo problema, signifika la’ós ha’u maka sunu-uma, oho animal no baku lezadu maske ha’u involve dunik iha grupu arte-marsiál,” arguidu deklara.
Hafoin rona arguidu sira, Tribunál adia hikas julgamentu ba loron seluk hodi kontinua rona sasin sira.
Tuir akuzasaun husi Ministériu Públiku (MP) katak iha loron 4 fulan-Fevereiru 2019, arguidu PS involve iha grupu arte-marsiál ida organiza nia kolega sira inklui arguidu NS ba iha lezadu Constâncio Costa nia uma ne’ebé lokaliza iha Hatukesi, Liquiça ho intensaun atu buka lezadu maibé lezadu halai, tanba ne’e arguidu na’in-rua sunu lezadu nia uma, inklui oho fahi rua, bibi hat, arguidu sira mos sunu lezadu Cornelio da Costa nia uma inklui oho bibi ualu, fahi lima no manu hat, tanba ne’e Ministériu Públiku akuza arguidu na’in-rua ba pratika krime danu ho violénsia ne’ebé previstu iha artigu 260 husi kódigu penal Timor Leste.
Audiénsia julgamentu prezide husi juiz koletivu Alvaro Maria Freitas, José Gonçalves, Argentino Nunes, MP reprezenta husi Prokuradór Reinato Berenahak no arguidu hetan asisténsia legal husi Defensor Públiku Manuel Exposto.
Jornalista: Carmelita Isaac