Armanda Berta Hakarak Sai Xefe Estadu Ne’ebé Hametin Identidade Kulturál

Hatutan.com, (02 Marsu 2022), Díli—Kandidata Prezidente Repúblika períudu 2022 to’o 2027 hosi Partidu Kmanek Haburas Unidade Timor Oan (KHUNTO) ho númeru sorteiu 9, Armanda Berta dos Santos, deklara ba apoiante sira katak, bainhira eleita sai Xefe Estadu, sei hametin identidade kulturál.

Abertura kampaña Kandidata Prezidente Repúblika Armanda Berta dos Santos iha kampu futeból Ainaro-Vila, Kuarta (02/03/2022). Foto/Média Partidu KHUNTO.

“Bainhira imi hili ha’u, sei sai Prezidente ba Povu tomak no sei hametin identidade kulturál hodi promove ita nia identidade kulturál liuliu promove kultura tradisionál sira, hanesan lian, uma-lisan, tais no fiar Kristaun ne’ebé iha,” Armanda Berta dos Santos, lee testu iha ámbitu abertura kampaña no transmite direta hosi pájina ofisiál média sosiál apoiu Armanda Berta, ne’ebé hala’o iha Kampu futeból Ainaro Vila, Munisípiu Ainaro, Kuarta (02/03/2022).

Notisia iha Relasaun:Lú Olo Promete Respeita Prinsípiu Separasaun Podér

Kampaña aberta ne’e hetan apoiu másimu hosi apoiante ne’ebé maioria mai hosi Partidu KHUNTO maihosi postu administrativu sira ne’ebé pertense ba munisípiu ne’e hanesan Ainaro Vila, Maubisi, Hatubuilico no Hatudo.

Armanda Berta mós komprometida sei kumpre de’it konstituisaun bainhira eleita nu’udár Xefe Estadu, liuliu respeita no tane aas prinsípiu separasaun podér.

Kandidata hosi Partidu KHUNTO ne’e preokupa no sei tau mós prioridade atu servisu hamutuk ho Governu oinsá halo jestaun di’ak ba fundu mina-rai ne’ebé Timor Leste iha.

“Ha’u mai ho ha’u nia kompromissu atu hametin soberania. Oras-ne’e daudaun ita depende hela ba mina no gas ne’ebé loron ida sei maran. Tanba ne’e, ha’u sei fó-hanoin ba Governu atu jere loloos riku soin hotu ne’ebé la’ós mina no gas de’it maibé hanesan mós marmer, kafe, ai-kameli, rekursu tasi, rekursu foho no seluk tan,” nia hateten tán.

Kampaña ne’e observa direta hosi observadór nasionál, internasionál no hetan seguransa másimu hosi Polísia Nasionál Timor-Leste (PNTL).

Jornalista: Vito Salvadór