Hadera-an ho Karidade, Orasaun no Jejún

Hatutan.com, (02 Marsu 2022), Díli—Sarani Katólika iha mundu tomak selebra Kuarta Feira Sinzas, ho sentidu katak sarani sira tama daudaun iha inísiu preparasaun ba selebrasaun festa Páskoa.

Arse-Bispu Arkedioseze Metropolitana Díli, Dom Virgílio do Carmo da Silva, SDB tau sinál krúz Sinzas nian, ba sarani sira iha Katedrál Díli, Kuarta Feira Sinzas (02/03/2022). Foto/Hatutan.com.

Kuarta Feira Sinzas hahú ho sinál krúz sinza nian iha rentos ka kari iha ulun hanesan sinál hadera an.

Kuarta Feira Sinzas inisia tempu kuarezma no jejun durante loron 40 ba sarani Kristaun Katólika. Sinza ne’e nu’udár símbolu ema mai hosi rai-rahun.

Hahú kedan Kuarta Feira Sinzas Sarani Katólika hahú hala’o tempu Kuarezma no Jejun ne’ebé hala’o durante loron 40.

Durante periudu hadera an ne’e, sarani Katólika tenke halo rekonsiliasaun atu hadi’a relasaun ho maluk sira no relasaun ho Maromak.

Simu ahu kdesan iha rentós, ho sentidu ema nia moris iha rai ne’e iha finalidade. Tanba ne’e, hanesan kriatura Maromak nian, ema presija moris iha haraik an hodi prepara an nafatin ba hasoru nia finalidade hosi viajen moris ne’ebé hatudu ema nia isin sei fila ba rai rahun.

Arse-Bispu Arkedioseze Metropolitana Díli, Dom Virgílio do Carmo da Silva, SDB ih nia omília missa Kuarta Feira Sinzas iha Katedrál Díli, esplika simu Sinzas ne’e mós nu’udár identidade Maromak oan, tanba ne’e hanesan sarani di’ak sei moris tuir doutrina no Santa Kreda nia ukun, atu manán salvasaun ba nia moris rasik.

“Iha buat tolu importante sarani di’ak ida tenke halo durante tempu hadera an mak hanesan halo karidade ka fó ezmola, orasaun no jejún.  Santa kreda husu atu sarani sira uza meius tolu ne’e ho di’ak molok tama ba festa Páskua,” Dom Virgílio do Carmo da Silva hateten.

Sarani sira tenke kumpri promesa liuliu halo abstinénsia no jejún, signifika han no hemu sukat hodi kontempla Jesus nia terus, hanesan ema fiar na’in sente mós terus hodi hanoin frakeza umana sira atu bele manán.

Jejún
Hahú hosi Kuarta Feira Sinzas 02 Marsu to’o Sesta Feira Santa 15 Abril 2022. Sarani ne’ebé obrigatoriamente halo jejun ka loron ida han dala ida maka sira ne’ebé ho idade 18 to’o 50.

Abstinénsia

Abstinénsia hanesan la han na’an ka hahan sira seluk ne’ebé ema gosta iha Kuarta Feira Sinzas no loron Sesta durante periudu Kuarezma to’o Sesta Feira Santa.

Jornalista: Vito Salvadór