Defeza & Seguransa
Kampaña Loron Rua, Insidente Ida De’it iha Ainaro
Hatutan.com, (04 Marsu 2022), Díli—Kampaña Prezidensiál durante loron rua, hahú hosi 02 to’o 03 Marsu 2022, Ministériu Interiór (MI) simu kazu insidente ida de’it ne’ebé relata hosi Polísia Nasionál Timor Leste (PNTL), akontese iha Munisípiu Ainaro.
Abertura kampaña Kandidata Prezidente Repúblika Armanda Berta dos Santos iha kampu futeból Ainaro-Vila, Kuarta (02/03/2022). Foto/Média Partidu KHUNTO.
Vise-Ministru Interiór, António Armindo hamutuk ho Komandante Jeral PNTL, Komisáriu Polísia Faustino da Costa no Segundu Komandante Jerál Komisáriu Mateus Fernandes, relata kazu ne’e ba Primeiru-Ministru (PM) Taur Matan Ruak.
Notisia iha Relasaun:Husik Hela Viqueque, Lere Kumprimenta Xanana ho Horta iha Larigutu
“Hahú loron dahuluk ba kampaña, jeralmente buat hotu la’o normál, iha de’it insidente kiik ida envolve sidadaun ida ne’ebé halo azneiras iha primeira kampaña iha Ainaro, depois seguransa sira halo atuasaun lori ba komandu identifika katak sidadaun ne’e defisiénsia mental,” António Armindo, hateten hafoin relata situasaun jerál seguransa iha rezidénsia ofisiál Primeiru Ministru, Faról, Sesta (004/03/2022).
Situasaun jerál ba loron rua nian la’o di’ak tanba hetan duni seguransa másima hosi PNTL no Komandu PNTL simu relatóriu kada loron hosi Komandu Munisípiu sira, relatóriu ne’e mós haruka ona mai Ministru Interiór.
Vise-Ministru Interiór, António Armindo hamutuk ho Komandante Jerál PNTL, Komisáriu Polísia Faustino da Costa no Segundu Komandante Jerál Komisáriu Mateus Fernandes. Foto/MI.
Kestiona kona-bá envolvimentu minoridade durante kampaña, António Armindo hateten ne’e kompeténsia Comissão Nacional de Eleições (CNE) nian hodi fó hanoin ba partidu politiku sira atu toma atensaun ba militante sira hodi labele mai lori labarik sira partisipa iha kampaña.
Parte PNTL mós sei la bandu ema ne’ebé lori labarik mai kampaña, tanba ne’e CNE presija halo nafatin sensiblizasaun ba ekipa susesu kada kandidatura atu fó-hanoin ba militante no komunidade atu labarik kiik labele ba fatin kampaña.
Vise Ministru ne’e simu ona orientasaun atu kontinua servisu hamutuk ba estabilidade, liu-liu asegura eleisaun Prezidensiál nian no orientasaun ba Komandu PNTL maka fó hanoin ba membru sira kona-bá disiplina, respeita eirarkia hosi komandante sira to’o ofisiais superiór sira.
Jornalista: Rogério Pereira Cárceres