Lautem
Apoiante Lere Anan Timur Hetan Asidente, Ida Mate no Rua Tohar
Hatutan.com, (05 Marsu 2022), Díli—Apoiante hosi Kandidatu Prezidente Repúblika períudu 2022 to’o 2027, Tito Cristóvão da Costa (Lere Anan Timur) hetan asidente iha aldeia Samari, Suku Ililae Laivai, Postu administrativu Lautém.
Vítima Asidente iha Samari, Suku Ililae Laivai, Postu administrativu Lautém. Foto/facebook.
Asidente ne’e rezulta Ozório dos Santos mate-fatin no Agustina Perreira ho Faustina dos Santos hetan tohar inklui na’in-tolu seluk hanesan Armando da Conceição, Regina dos Santos ho Agostinho Maria Ximenes hetan kanek kamán.
Asidente tráfiku ne’e akontese bainhira vaskolante ne’ebé tula apaoiante sira, hafoin partisipa kampaña polítika iha Suku Ililae Laivai, aldeia Samari ne’ebé hala’o iha loron 04 fulan ne’e.
Tuir informasaun ne’ebé Hatutan.com hetan katak, vaskolante ne’e bakufila bainhira tula militante hamutuk na’in 30 no halai ho velosidade aas.
Hafoin akontesimentu, vítima sira evakua kedan ba Hiospitál Referál Eduardo Ximenes Baucau, hodi hetan tratamentu médika.
Jornalista: Carmelita Isaac