Hatutan.com, (07 Marsu 2022), Covalima—Comissão Nacional Eleição (CNE), detekta durante kampaña eleisaun prezidensiál iha munisípiu Covalima, iha funsionáriu públiku no ajente administrasaun barak mak partisipa direta no mobiliza masa ba kampaña kandidatu tinan 2022-2027 iha terrenu.
Durante kampaña iha munisípiu Covalima, CNE observa no deteta katak funsionáriu públiku barak mak abandona sira nia servisu hodi involve direta iha kampaña no deteta mós funsionáriu públiku balun sai hanesan portavóz no ekipa susesu kandidatu prezidente repúblika.
Notisia iha Relasaun:PNTL Rejista Vítima Na’in-16 iha Konfrontu Entre Apoiante Kandidatu PR
Iha estatutu funsaun públika, bandu funsionáriu públiku partisipa direta iha kampaña aberta hodi abandona servisu, no sira bele partisipa de’it bainhira hatama karta lisensa anuál ka lisensa sen vensimentu inklui lisensa espesiál.
“Infelizmente ita la simu karta lisensa hosi funsionáriu públiku sira relasiona ho sira nia partisipasaun direta iha kampaña, nune’e CNE sei relata faktus ne’e ba Komisáriu sira CNE nian atu iha plenária hodi foti desizaun no haruka ba Komisaun Funsaun Públika,” Hermenegildo de Sena hateten.
Tama ba kampanha eleitoral loron da-neen hosi kandidatu Prezidente Repúblika sira iha munisípiu Covalima, CNE munisipál deteta funsionáriu lubuk ida no oras ne’e parte CNE liu hosi ofisiál sira ne’ebé hala’o servisu iha terrenu sei rekolla dadus no sei submete ba CNE nasionál no sei deside iha Konsellu Altu Nível CNE nian liu hosi Komisáriu sira.
“Ita haree funsionáriu públiku sira ne’ebé partisipa direta maka ajente administrasaun públiku sira hanesan funsionáriu hosi ministériu edukasaun, saúde no agrikultura,” nia haktuir.
Kona-bá sansaun ka medida atuasaun ba funsionáriu públiku sira ne’ebé viola estatutu funsaun públiku nian Porta vóz CNE munisipiu Covalima ne’e hateten, ne’e kabe ba kompeténsia superiór sira nian no hanesan ema tékniku hala’o de’it servisu iha terrenu tuir orientasaun hosi superiór sira.
“Ami rekolla de’it dadus no relata ba superiór sira atu foti desizaun tuir lei ne’ebé vigora,” nia hateten tán.
CNE munisipiu Covalima iha ofisiál 103 kompostu hosi postu administrativu neen hanesan Suai-Villa, Tilomar, Maucatar, Fohorem, Fatumea, Zumalai no Fatululik.
Jornalista: Vito Salvadór
