Hatutan.com (07 Marsu 2022), Díli—Tribunál Distritál Díli (TDD), hala’o julgamentu ba krime omesídiu agravadu, ne’ebé deskonfia involve arguidu na’in 18, tanba oho no so’e ona vítima Hendrique Soares iha arredor edifisiu Universidade da Paz (UNPAZ).
Arguidu nain 18 mak hanesan Francisco Palmira, Feliciano Tilman, Dália Imaculada da Cruz, Francisco de Carvalho, Quintino Bianco, Santiago Pereira, José Lúcia, João Paulo, Alfredo Verato, Lucas Soares, João Soares, Joana da Silva, Deonísio Pereira, Leonito da Silva, Zeferino Carvalho, Germano Paulo, Natalino Ivo no João Câncio.
Notisia iha Relasaun:Arguidu Na’in 13 ba Kazu Omesídiu UNPAZ Submete ba Julgamentu Dahuluk
Iha julgamentu kontinuasaun ne’e, arguidu Quintino Bianco ne’ebé iha tempu ne’ebá sai hanesan seguransa UNPAZ nian deklara katak, nia parte laiha koñesimentu kona-bá vítima nia mate, maski momentu ne’ebá nia mak pikete.
“Momentu ne’ebá João ho Joni mak ba husu duni vítima iha ha’u, maibé ha’u la hatene tanba ha’u la hetan nia. Maibé, liu tiha minutu sanulu ha’u rona ema hakilar katak Hendrique mate, nune’e ha’u mós halai ba haree hosi dook de’it tanba ema komesa tuda-malu ho estudante sira,” arguidu deklara.
Momentu ne’ebá nia parte la hamate lampu sorot, tanba momentu ne’eba mós ahi mate rasik bainhira manas, maibé antes ne’e estudante ne’ebé hala’o estájiu iha ne’ebá kontinua sei kanta halimar.
Hafoin rona arguidu, Tribunál adi’a hikas julgamentu ba loron seluk hodi kontinua rona arguidu sira seluk.
Ministériu Públiku (MP) akuza arguidu sira ba prátika krime omesídiu agravadu ne’ebé previstu iha artigu 139 hosi kódigu penál TL, relasiona ho kazu omisídiu ne’ebé akontese iha UNPAZ iha loron 20 fulan Juñu 2021, ne’ebé hamate ona Hendrique Soares.
Audiénsia julgamentu iha Segunda 07 Marsu tinan ne’e, prezide hosi juiz kolektivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.
Jornalista: Carmelita Isaac
