Hatutan.com (07 Marsu 2022), Díli—Tribunál Distritál Díli (TDD) liu hosi leitura sentensa ne’ebé deside hosi juiz kolektivu Maria Solana, Ana Paula Fonseca, Evangelino Belo deside aplika multa ho montante $60 ba ofisiál justisa Tribunál Distrital Oecuse (TDO), arguida Zinha Maria Soares ba krime pekulatu tanba privatiza osan kustu judisiáriu ho montante $250.
Audiénsia iha Segunda loron 07 fulan ne’e, Tribunál deside aplika multa ba arguida tanba konsidera antes julgamentu arguida koopera hodi devolve ona osan refere ba kofre Estadu.
Notisia iha Relasaun:Ofisiál Justisa TDO Ameasada Pena Suspensaun Tinan Rua
Tribunál mós konsidera durante ne’e arguida servisu kleur ona iha instituisaun Estadu ne’e, liu-liu sai hanesan ofisiál justisa iha Tribunál Distritál Dili no daudaun iha TDO, maski antes ne’e arguida hetan ona pena suspensaun no hetan prosesu disiplinár ba aktu ne’ebé arguida komete.
Tanba ne’e, iha audiénsia liu hosi juiza Ana Paula Fonseca husu ba arguida atu halo ezame de konsiénsia ba nia an hodi hadi’a ninia dezempeñu servisu, liu-liu iha ninia responsabilidade hanesan ofisiál justisa.
Antes ne’e, tuir akuzasaun hosi Ministériu Públiku (MP) katak, iha loron 05 Fulan Abríl 2019, Tribunál Distritál Díli hamonu desizaun ba kazu Krime pekulatu inklui deside kustu judisiáriu ho montante $250.
Iha loron ne’e kedan, entrega osan ba arguida hanesan kustu judisiáriu nian, tanba momentu ne’ebá arguida hanesan ofisiál justisa iha TDD, maibé osan ne’e arguida la depozita ba kofre Estadu hodi utiliza ba nesesidade privada, tanba ne’e MP akuza arguida ba pratika krime pekulatu ne’ebé previstu iha artigu 295 hosi kódigu penál TL.
Audiénsia julgamentu prezide hosi juiz kolektivu, Maria Solana, Ana Paula, Evangelino Belo no Ministériu Públiku reprezenta hosi Prokuradór Domingos Gove Barreto no arguida hetan asisténsia legál hosi Defensór Públiku, Fernando Da Costa.
Jornalista: Carmelita Isaac
