Anacleto Bento Promete Asuntu Importante Lima

Hatutan.com, (08 Marsu 2022), Díli—Kandidatu Prezidente Repúblika hosi Partidu Demokrátiku Repúblika Timor (PDRT), Anacleto Bento Ferreira iha asuntu importante lima (5) ne’ebé promete ba apoiante sira hodi bele implementa durante mandatu tinan lima, bainhira eleitu nu’udár Prezidente Repúblika.

Kandidatu Anacleto Bento hala’o kampaña ho tipu diálogu no dor to’o dor iha aldeia Ailele-Hun, suku Kamea, postu administrativu Kristu Rei, munisípiu Díli, Domingu (06/03/2022). Foto/Ekipa Susesu Kandidatu Anacleto Bento.

Promesa ne’e Anacleto hato’o bainhira hala’o kampaña ho tipu diálogu iha aldeia Ailele-Hun, suku Kamea, postu administrativu Kristu Rei, munisípiu Díli, Domingu 06 Marsu 2022.

Notisia iha Relasaun:Lamukan Promete Promulga OJE Alokadu ba Estrada Rurál iha RAEOA

Pontu lima ne’ebé Kandidatu PDRT ne’e promete mak hanesan primeiru, Hametin Unidade Nasionál, Ssegundu, Hatuur Lei ho interpretasaun jurídika la’ós ho interpretasaun polítika, terseiru Reforsa liu tán Governu iha Relasaun Internasionál, Kuartu Buka dalan hodi ajuda moderniza instituisaun defeza no seguransa, kintu Apoia makás liu tán órgaun ezekutivu iha prosesu dezenvolvimentu nasionál.

“Bainhira ha’u eleitu duni iha eleisaun prezidensiál tinan ida ne’e, sei armoniza di’ak liután relasaun ho governu ho liafuan badak katak sei sai Prezidente Republika ne’ebe Pró servisu hamutuk ho governu, Pro povu no sosiedade ka entidade hotu hodi bele lori nasaun no povu rai ida ne’e ba moris iha ambiente ne’ebe hakmatek,” nia hateten.

Nia mós promete katak, bainhira eleitu nu’udár Xefe Estadu sei haree programa balun ne’ebé mai hosi Governu, sei halo analiza no sente katak programa la responde ba moris povu ninian maka sei uza ninia kompeténsia tomak hodi veta tuir Konstituisaun Repúblika Demokrátiku Timor Leste (K-RDTL) haruka.

Kampaña ho tipu diálogu no dor to’o dor hosi kandidatu ne’e hetan akompañamentu hosi Prezidente PDRT, Agostinho Gomes, ho estrutura nasionál no estrutura munisipál sira.

Jornalista: Carmelita Isaac