PNTL Detein Autór Na’in-Hitu ba Konfrontu Apoiante Kandidatu PR iha Baucau

Hatutan.com, (10 Marsu 2022), Díli—Polísia Nasionál Timor-Leste (PNTL), liuhosi Komandu Munisípiu Baucau, kaptura no detein ona autór-sira hamutuk ema na’in-hitu, tanba deskonfia envolve iha konfrontu entre apoiante kandidatu Prezidente Repúblika sira iha área Postu Administrativu Venilale, Munisipiu Baucau.

Konfrontu entre apoiante balun ba kandidatu Prezidente Repúblika iha Baucau, Domingu (03/07/2022). Foto/Facebook.

Konfrontu ne’e akontese iha Domingu 06 Marsu 2022 hosi militante partidu Frente Revolusionáriu Timor-Leste Independente (FRETILIN) no Partidu Kmanek Haburas Unidade Nasionál (KHUNTO), iha área Venilále bainhira fila hosi kampaña iha Postu Administrativu Baucau Vila. 

Notisia iha Relasaun:PNTL Rejista Vítima Na’in-16 iha Konfrontu Entre Apoiante Kandidatu PR

“Insidente ida iha Domingu ne’e, ninia autór sira balun ita kaptura ona hamutuk nain-hitu. Liu-liu sira ne’ebé mak halo konfrontasaun iha Venilale,” Komandante PNTL, Komandu Munisípiu Baucau, Superintendente Polísia, António de Sá, informa ba Hatutan.com iha via telefónika, Kinta (10/03/2022).

Suspeitu sira ne’e ho naran inisiál mak hanesan MDS (20), RPG (20), BDS (19), NBF (47), JCB (23), hela fatin iha Caudade, Uma-Ana Ulu, Venilále. AF (20), hela fatin Caudade, Uma-Ana Ikun, no suspeitu ho inisial JAS, hela fatin Lacu-Uma, Mahamori Venilale (45).

“Ita kaer tiha na’in-hitu ona no sira ne’e mane hotu kedan no suspeitu sira ne’e kapturadu hosi Polísia,” nia hateten.

Daudaun ne’e Komandu PNTL Munisípiu Baucau aplika hela Termu Identidade Reziénsia (TIR) ba suspeitu sira.

Polísia kontinua nafatin identifika sasán estragus, tantu autór sira seluk tán ne’ebé maka ligadu ho insidente ne’e, ne’ebé sei kaptura hotu atu submete ba prosesu.

PNTL Baucau mós kontinua halo hela prosesu identifikasaun ba suspeitu sira, hodi buka identifika militante sira mai hosi partidu poltiku ida ne’ebé. Maibé PNTL deskonfia suspeitu sira ne’e nu’udár membru hosi GAM (Grupu Arte Marsial) balun iha Baucau.

“Agora dadauk ita investiga hela, mais sira iha indísius no polisia deskonfia sira ne’e mai hosi grupu artes marsiais,” António De Sá esplika tán.

FM Konsidera Atendimentu PNTL Tarde

Diretór interinu hosi Fundasaun Mahein (FM), Sancho Xavier haree katak, durante konfrontu entre militante sira hosi partidu FRETILIN ho KHUNTO nian iha Munisipiu Baucau, atendementu PNTL nian ‘sempre’ tarde.

Sancho Xavier fó ezemplu kona-bá kazu sira ne’ebé mak akontese iha Baucau, iha Postu Administrativu Uatulari Viqueque, depois de problema hirak ne’e akontese mak PNTL foin halo atuasaun.

“Problema ida maka konfrontu ne’ebé akontese. PNTL tarde atu halo atuasaun. Loloos ne’e, iha komboiu sira hanesan ne’e PNTL akompaña, tanba ho masa barak no masa boot. Entaun, ita haree durante ne’e PNTL tarde atu halo atuasaun, no ida ne’e mós bele provoka problema,” Diretór interinu FM, Sancho Xavier hateten.

Fundasaun Mahein ne’ebé nu’udár Organizasaun La’ós Governu nian ho papél atu halo peskiza, monitorizasaun, ho advokasia ba setór Seguransa ho Defeza iha TL, husu ba komandu PNTL atu haree situasaun mak mosu antes ne’e sai hanesan lisaun ida, hodi asegura ho di’ak liután.

Tuir Sacho Xavier, iha komísiu ne’ebé sei hala’o tán iha loron sira tuir-mai, posibilidade sei bele mosu tán problema, bainhira PNTL ‘la preparadu’.

“Tanba ne’e, PNTL apreende ona lisaun ida ne’e, oinsá atu bele halo vizilánsia, depois akompaña komboiu sira ne’ebé hosi fatin ida ba fatin seluk, oinsá atu evita konfrontu sira iha dalan,” diretór interinu FM ne’e, fó-hanoin.

Jornalista: Rogério Pereira Cárceres