MP Delega Ona Kompeténsia Ba CAC Arrola Sasín Kazu Set-top Box RTTL,E.P

Hatutan.com (11 Marsu 2022), Dili– Ministériu Públiku (MP) delega ona kompeténsia ba Komisaun Anti-Korrupsaun (CAC, sigla portugés)  hodi hahú arrola sasin sira atu ba presta deklarasaun iha CAC, kona-bá indísiu krime ne’ebe iha relasiaun ho projetu  intalasaun Set-top box/dexodificador Rádiu Televizaun Timor Leste, Empreza Públika (RTTL,E.P).

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Adjuntu Komisáriu CAC ba asuntu Prevensaun no Sensibilizasaun, Luis de Oliveira Sampaio. Foto/Hatutan.com

Karta delegasaun kompetensia ne’e rasik CAC simu iha semana ida ba kotuk, tanba ne’e bainhira laiha impedimentu, maka iha semana oin, CAC sei hahú loke prosesu no bolu sasin sira.

“MP valida notísia krime ne’ebé ami submete on aba MP iha fulan-Dezembru 2021 hodi apresia no MP hasai ona delegasaun ba CAC,” Adjiuntu Komisáriu CAC ba asuntu Sensibílizasaun no Prevensaun, Luis de Oliveira Sampaio ba Hatutan.com iha  Edifísiu CAC, Farol, Dili, Sesta (11/03/2022).

Iha semana oin, tuir Adjuntu CAC ne’e katak,  hahú loke prosesu hodi bolu sasin sira mai. “Bainhira ami bolu sasin sira mai atu presta deklarasaun, maka ita-boot sira sei hatene, tanba labele ultrapasa regra prosesual no presiza halo aprosimasaun no estratejia,” Luis de Oliveira Sampaio hateten.

CAC alista ona sé-sé deit maka sei bolu hodi presta deklarasaun hanesan sasin iha semana oin.

Notísia iha Relasaun: CAC Submete Ona Kazu Projetu Set-top Box RTTL,E.P Bá Ministériu Públiku

CAC konsidera iha ona indisiu krime maka MP valida no delega kompeténsia ba CAC hodi bolu sasin sira, tanba bainhira laiha indisiu krime maka MP sei la valida no la delega kompénsia ba CAC hodi halo servisu ida-ne’e, maibe iha prosesu investigasaun maka sei hatene klaru. 

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nudár Sekretaria iha Gabineten Prezidente FFTL.  

Jornalista: Carmelita Isaac