Autór Oho Manuel Pereira iha Nunumoge, Submete ba Primeiru Interrogatóriu

Hatutan.com, (14 Marsu 2022), Díli—Iha Segunda 14 Marsu tinan ne’e, Ministériu Públiku (MP) hamutuk ho Polísia Nasionál Timor-Leste (PNTL), liuhosi Komandu Munisípiu Ainaro, akompaña no transporta ona autór ne’ebé oho Manuel Perreira iha Nunumoge Munisípiu Ainaro, ba Munisípiu Covalima hodi submete ba prosesu primeiru interrogatóriu iha Tribunál Distritál Suai (TDS).

Suspeitu ho naran inisiál EA (58), ne’ebé uza nia katana hodi ta’a mate vítima Manuel Pereira (30) iha aldeia Coiloco, Suku Nunomoge, Postu Administrativu Hatubuilico, Munisipiu Ainaro, Sábadu (12/03/2022). Foto/Facebook.

“Agora daudaun iha ona viajen ba Tribunál Distritál Suai hodi submete ba primeiru interrogatóriu,” Portavós Komandu Jerál PNTL, Superintendente Xefe Polísia Armando Monteiro informa ba jornalista, liuhosi konferénsia imprénsa iha Kuartél Jerál, Caicoli, Segunda (14/03/2022).

Tuir kronolojia, iha Sábadu 12 Marsu 2022, maizumenus tuku 13:00 oras loron, mosu kazu insidente ida iha aldeia Coiloco, Suku Nunomoge, Postu Administrativu Hatubuilico, Munisipiu Ainaro.

Iha kazu insidente ne’e, rezulta suspeitu ho naran inisiál EA (58), ne’ebé uza nia katana hodi ta’a mate vítima Manuel Pereira (30) no tetak ninia kakorok to’o kotu, ain-tuur no isin-lolon tomak.

Hafoin simu informasaun hosi komunidade no autoridade lokál sira, kona-bá kazu insidente ne’e, komandu PNTL Munisípiu Ainaro, liuhosi Servisu Investigasaun Kriminál (SIK) ba kedan lokál do krime, hodi hola medida sira polísia nian no halo kedan kapturasaun ba suspeitu.

Komandante Armando haktuir katak, motivu hosi kazu oho-malu ne’e tanba ódiu no vingansa iha pasadu entre suspeitu ho vítima.

“Vítima ho suspeitu iha problema antes ona no vítima mós hetan ona akuzasaun, kumpri nia dever, hafoin sai hosi prizaun no tenta provoka-malu. Entaun, vítima sai fali suspeitu ba kazu ódiu vingansa iha pasadu ida-ne’e,” Komandante Armando konta-tuir.

Oras-ne’e daudaun, mate-isin iha ona prosesu autopsia no sei entrega hikas ba família atu hala’o prosesu funerál.

Jornalista: Rogério Pereira Cárceres