PNTL Halo Apreensaun Ba Motorizada 108 husi Simpatizante CNRT

Hatutan.com, (15 Marsu 2022), Dili-Polísia Nasionál Timor-Leste (PNTL) halo epreensaun ba motorizada hamutuk 108 husi simpatizante no militante partidu CNRT nian tanba vióla Lei Kódigu Estrada bainhira partisipa iha kampaña ikus Kandidatu Prezidente Repúblika, José Manuel Ramos Horta nian iha Tasi Tolu, Dili, Tersa (15/03/2022).

PNTL Munisípiu Dili halo apreensaun ba motorizada 108 husi simpatizante PNTL ne’ebé viola lei kódigu Estrada, 15 Marsu 2022. Foto/Hatutan.com

“Ohin, númeru ne’ebé mak ami iha ne’e, motorizada 108. Hosi númeru motizada ne’e, sira-nia infrasaun ne’e mak, uza kenal poot-resin, la uza kapasete, balu laiha xapa matrikula, balu laiha espellu, balu tula ema na’in-tolu,” Komandante PNTL Munisípiu Dili, Superintendente Xefe Polísia, Henrique da Costa hateten ba Hatutan.com, iha via telefónika.

Maske PNTL halo apreensaun ba motirzada hirak-ne’e maibé kontinua autoriza atu motorizada nia na’in sira bele partisipa iha kampaña eleitóral. Maibé, atu foti fila-fali sira-nia motorizada, tenke liuhosi prosesu selu multa.

Komandante Herique husu mós ba militante no apoiante sira hosi kandidatu PR sira seluk nian katak, bainhira ho motorizada ba partisipa iha kampaña eleitorál tenke respeita nafatin ba lei kódigu estrada, hodi nune’e bele evita dezastre ba aan.

Atividade pasa revista iha ámbitu kampaña eleitóral ne’e, Komandu Munisípiu Dili, hetan apoiu seguransa hosi Kuartel Jerál PNTL, Unidade Polísia Marítima (UPM), Unidade Patrullamentu Fronteira (UPF), no unidade hotu, hodi halo pasa revista no mós hodi garante seguransa ba iha ámbitu kampaña loron ikus kandidatu RP José Ramos Horta ne’ebé hetan apoia másimu husi partidu CNRT.

Komandu PNTL Dili mós kontinua hala’o atividade pasa revista ne’e, Kuarta (16/03/2022), hodi kontrola movimentu transporte públiku liu-liu motorizada sira ne’ebé konduz hosi militante no apoiante sira partidu FRETILIN ho KHUNTO nian.

Jornalista: Rogério Pereira Cárceres