Hatutan.com (15 Marsu 2022), Díli—Kandidatu independente Prezidente Repúblika 2022 to’o 2027 ho númeru sorteiu 4, Rogério Tiago Lobato iha ninia kompromisu polítika, bainhira eleitu sei fó atensaun ba joven ne’ebé servisu iha rai-liur hanesan Inglatera, Irlándia Norte, Súl Koreia no Austrália.
Kandidatu ne’e sei uza ninia kompeténsia nu’udár Prezidente Repúblika, atu fó-hanoin ba Governu no entidade relevante sira atu bele tau-matan no defende Timor-oan sira bainhira hasoru difikuldade iha ema nia rai.
Notisia iha Relasaun:Lú Olo Sei Hakruk ba Konstituisaun Atu Garante Dezenvolvimentu Nasionál
“Tanba ne’e, bainhira eleitu sei fasilita Timor-oan ne’ebé hakarak ba servisu iha rai-liur uza de’it pasaporte Timor,” Hatutan.com sita programa prinsipál ida hosi kandidatu númeru sorteiu 4 ne’ebé durante uza nu’udár kompromisu polítika iha kampaña.
Hatutan.com mós sita deklarasaun Rogério Lobato nian liuliu kona-bá kompromisu ida-ne’e iha ninia kampaña ho tipu diálogu ne’ebé hala’o iha Timor Lodge, Comoro Domingu (13/03/2022).
Rogério Lobato sei valoriza traballadór sira tanba konsidera reseita joven ne’ebé servisu iha rai-liur mai hosi esforsu sira nian hakarak hadi’a moris.
Tanba ne’e, nia husu ba embaixada Timor-nian iha Inglatera, Irlándia Norte, Súl Korreia no Austrália atu tau-matan ba traballadór sira, tanba utiliza pasaporte rua hanesan pasaporte Portugál no Timor-Leste.
Tuir kalendáriu, kampaña ikus hosi kandidatu Rogério Tiago Lobato nian sei hala’o iha Postu Administrativu Letefoho, munisípiu Ermera iha Tersa 15 Marsu 2022.
Jornalista: Carmelita Isaac
