Hatutan.com, (16 Marsu 2022), Díli—Kandidata independente ba Prezidente Repúblika 2022-2027 ho númeru sorteiu 1, Isabel da Costa Ferreira hala’o vizita ba grupu Boneca Ataúro iha Hospedaria, Suku Vila-Maumeta Munisipiu Ataúro.
Isabel da Costa Ferreira. Foto/Ekipa Susessu Kandidatu númeru sorteiu 1.
Isabel promete iha enseramentu kampaña ikus ne’e katak, bainhira eleita ka povu fó konfiansa ba nia hodi sai Prezidente Repúblika maka sei la husik konfiansa ne’e monu ba rai.
“Ha’u kontente loos ho servisu imi nian, ha’u nia esperansa grupu ne’e sei dezenvolve di’ak liután iha futuru no ha’u promete se mak la’o ho ha’u ho konfiansa ne’ebé fo mai ha’u la monu ba rai,” Hatutan.com sita deklarasaun Isabel da Costa Ferreira iha pájina ofisiál facebook kandidatura nian iha Kuarta (16/03/2022).
Advertisement
Isabel sei tau konfiansa ne’e iha ninia kabas atu tau-matan hodi lori povu ne’e sai hosi terus no ki’ak tanba labele husik situasaun ne’e kontinua iha tempu independénsia.
Razaun fundamentál espoza Primeiru Ministru ne’e kandidata an tanba la’ós atu hetan osan hodi serve de’it ba an rasik, maibé hakarak sai inan ba nasaun hodi liberta povu hosi ki’ak no mukit.