Taur Konfirma “Troka” Membru Governu Na’in-haat

Hatutan.com, (17 Marsu 2022), Dili-Primeiru-Ministru (PM), Taur Matan Ruak, konfirma ona atu halo remodelasaun iha tempu badak hodi “troka” membru Governu na’in-haat.

Notísia iha Relasaun: Up-date Remodelasaun, PM Taur “Sei Labook” Membru Governu FRETILIN-KHUNTO

Primeiru Ministru (PM), Taur Matan Ruak. Foto/GPM

Maske la esplika detallu kona-bá membru Governu ne’ebé de’it mak atu troka ka hasai, maibé PM Taur Matan Ruak, garante katak tempu to’o públiku sei hatene se mak sei hetan ezonerasaun no sé-sé mak sei simu posse tanba ida-ne’e la’ós asuntu ida atu subar.

“Membru Governu hamutuk na’in-haat mak sei hetan remodelasaun mas seidauk definitivamente no kuandu tomada pose ita-boot sira hatene ona na’in-hira,” Taur Matan Ruak hateten ba jornalista sira iha Palásiu Prezidensiál, Dili, Kinta (17/03/2022).

Xefe Governu ne’e subliña katak nia sei dauk bele fó hatene ba públiku membru sira ne’ebé atu simu posse mai husi partidu ne’ebé de’it, maibé to’o nia tempu ema hotu sei hatene.

 Iha soru mutu ne’e ho Prezidente Repúblika, Francisco Guterres “Lú Olo” ko’alia kona-bá situasaun COVID-19 liuliu desizaun Governu nian hodi deside normaliza no flexibiliza medida sira hanesan loke hikas fronteira, atu ema bele tama sai livre maibé ho kondisaun ida ne’ebé Governu ezije mak ema hotu ne’ebé tama no sai husi territóriu nasionál tenke iha kartaun vasinasaun kompleta kontra COVID-19.

Alterasaun dahuluk ba Dekretu-Lei 26/2021, loron 26 fulan-Novembru kona-bá medida exesionál no temporáriu sira ba vijilánsia sanitaria hodi hatán ba COVID-19 sei haruka ba gabinete Prezidente Repúblika hodi analiza no karik Prezidente Repúblika iha opiniaun ruma sei hato’o molok halo promulgasaun.

Notísia iha Relasaun: Naran Tama Iha Lista Remodelasaun, Ministru Manuel Cárceres Kontinua Servisu To’o Loron Ikus

Jornalista: Vito Salvador