UNDP Oferese Komputadór Sanulu ba Sentru Tabulasaun Nasionál CNE

Hatutan.com, (17 Marsu 2022), Díli—Governu Japaun liu hosi projetu United Nation Development Programe (UNDP) Covid-Resilient Election in Timor-Leste (CORE-TL) oferese komputadór 10 ba sentru tabulasaun nasionál Comissão Nacional das Eleições (CNE), ne’ebé sai hanesan instrumentu ba ema hotu bele hetan informasaun aktualizadu kona-bá eleisaun no médida kontra Covid-19 iha kada estasaun de votus.

Governu Japaun liu hosi projetu UNDP Covid-Resilient Election in Timor-Leste (CORE-TL) oferese komputadór 10 ba sentru tabulasaun nasionál CNE, Kinta (1703/2022). Foto/Hatutan.com.

Alende apoiu komputadór, UNDP mós fó apoiu liu hosi atualizasaun Website CNE ho informasaun foun inklui Covid-19, semináriu dala ida ba eleitór foun hamutuk na’in 100 kona-bá Edukasaun Eleitorál no treinamentu ba funsionáriu kona-bá prevensaun Covid-19 iha tempu realiza eleisaun.

Notisia iha Relasaun:CNE-STAE Lansa Bulletin Votu Ba Eleisaun Prezidensiál

“Komputadór sanulu inklui sistema ba tabulasaun ne’e hodi asegura transaparénsia ne’ebé ema hotu sei asesu ba rezultadu eleisaun liu hosi tabulasaun ne’ebé sei hala’o iha nasionál bainhira kada munisípiu hatama rezultadu votus maske sira konta ona maibé sei lori mai tabulasaun nasionál atu ami halo kontájen liu-liu kona-bá keixa no reklamasaun ne’ebé iha inklui votu nulu ne’ebé iha no sei loke ba ema hotu asesu,” Prezidente CNE, José C. Belo Pereira hateten iha salaun CNE, Kinta (17/03/2022).

Apoiu ne’e importante ba CNE atu bele garante transparénsia kona-bá eleitór, fiskais liu hosi apurramentu nasionál ne’e.

Embaixadór Japaun iha Timor-Leste, Masami Kinefuchi, hateten eleisaun Prezidensiál tinan 2022 hanesan eleisaun primeiru né’ebé TL realiza iha situasaun pandemia.

Tanba ne’e, Japaun deside hodi fó suporta espesiál ba projetu UNDP Covid-Resilient Election in Timor-Leste (CORE-TL), hodi halo preparasaun né’ebé diferente hodi responde ba situasaun Covid-19.

CNE mós lansa Sentru Tabulasaun Nasionál no Plataforma Transformasaun Dijitál ho objetivu atu eleva koñesimentu komponente jestór eleitorál, hodi transmite informasaun eleitorál ho efisiente no efikás iha tempu eleisaun ho lala’ok ba prevensaun Covid-19.

Jornalista: Carmelita Isaac