Polítika
Xefe Governu Apela ba Sidadaun Sira Vota ho Dame
Hatutan.com, (17 Marsu 2022), Díli—Primeiru Ministru (PM) Taur Matan Ruak, apela ba sidadaun sira atu partisipa iha loron eleisaun ho dame hodi hili Xefe Estadu foun ba mandatu 2022-2027.
Xefe Governu ne’e akompaña kampaña tomak haree katak, la’o di’ak tebes maski iha insidente kiik oan balun ne’ebé akontese, maibé ne’e hotu la’o di’ak.
Notisia iha Relasaun:Isabel Ensera Kampaña ho Vizita Grupu Boneca Ataúro
Hanesan Xefe Estadu no Ministru Interiór sente kontente no husu atu sidadaun hotu mantein pás no estabilidade durante periudu eleisaun to’o iha loron apuramentu nasionál.
“Ha’u husu populasaun sira kontinua nafatin koopera atu kontribui ba estabilidade no seguransa nune’e eleisaun Prezidensiál ne’e la’o ho di’ak,” Taur Matan Ruak hateten ba jornalista sira, hafoin hasoru-malu ho Prezidente Repúblika iha Palasiu Prezidensiál Bairru-Pité, Kinta (17/03/2022).
Populasaun tenke iha vontade di’ak atu ba tuir votasaun hodi aumenta tasa partisipasaun tanba ne’e bele ajuda makás no refleta iha avaliasaun dezempeñu demokratiku país ne’e nian.
Husu ba sidadaun hotu-hotu se bele halo esforsu atu vota no hili kandidatu sira ne’ebé kandidata an ba Prezidente Repúblika atu bele sai Xefe Estadu ba povu.
“Se ita nia kontribuisaun di’ak, partisipasaun di’ak ne’e fó priviléjiu boot ba ita nia nasaun,” nia hateten.
Taur Matan Ruak parabeniza servisu kobertura jornalista sira nian durante kampaña eleisaun Prezidensiál ne’ebé di’ak no iha esperansa katak média liliu jornalista sira sei nafatin sai ibun no lian ba povu iha periudu eleisaun Prezidensiál ne’ebé sei realiza iha tempu badak.
“Parabens ba imi nia kobertura durante ne’e di’ak loos no ha’u espera imi laiha problema hodi kontinua servisu ba oin,” Xefe Governu ne’e fó parabens.
Tuir kalandáriu nasionál hosi Comissão Nacional das Eleições (CNE) ba Eleisaun Prezidensiál 2022-2027 sei realiza iha loron 19 fulan Marsu tinan ne’e.
Jornalista: Vito Salvadór