Hatutan.com, (18 Marsu 2022), Díli—Sekretariadu Tékniku Administrasaun Eleitorál (STAE) halo transportartasaun materiál sensitivu no naun sensitivu hanesan urnas no bulletin de votus ba sentru votasaun 130 iha munisípiu Díli.
Transportasaun materiál hirak-ne’e, hala’o simultaneamente iha Munisipiu 12 inklui Rejiaun Administrativa Espesiál Oecusse Ambeno (RAEOA), hodi halo preparasaun ba aban nian.
Notisia iha Relasaun:UNDP Oferese Komputadór Sanulu ba Sentru Tabulasaun Nasionál CNE
“Ohin halo serimónia simultaneamente iha edifísiu STAE hosi Munisipiu 12 inklui RAEOA hodi halo transportasaun materiál hanesan urnas ba sentru votasaun hotu iha Timor ne’ebé hetan akompañamentu husi observadór internasionál no nasionál, fiskais kandidatura, autoridade iha kada Munisipiu no hetan seguransa hosi PNTL inklui F-FDTL,” Diretór Jerál STAE, Acilino Manuel Branco, hateten iha serbisu fatin Dili, Sesta (18/03/2022).
Depois de transportasaun, materiál hirak ne’e sei hela iha kada sentru votasaun durante kalan ida, maibé sei asegura hosi brigada, ofisiál CNE, fiskais no seguransa hosi PNTL.
Aban dader tuku 6:00 parte seguransa sei entrega ba brigada no ofisiál hodi hahú halo preparasaun ba votasaun no tuku 7:00 komunidade bele ezerse direitu de votu to’o tuku 15:00 lorokraik.
Bainhira iha tuku 15:00 lorokraik maka eleitores sei barak iha formatura, maka votasaun kontinua la’o to’o remata mak foin halo kontájen inisiál no sei lori hikas ba STAE.
Utilizasaun urnas la’ós utiliza de’it hodi tau bulletin de votus, maibé tau mós lista votantes no karik iha sentru votasaun ida maka eleitores barak liu maka bainhira urnas nakonu bele troka fali.
Alende ne’e, STAE konsidera bulletin de votus ne’ebe aat ka inválidu hanesan hosi munisipiu Manatuto aat haat, Aileu 47 no Covalima 137 ne’e parte ida hosi preparasaun nian, tanba iha identifikasaun ne’e transparante ho prezensa entidades hotu nian,
Tanba ne’e, bainhira imprime bulletin de votus la’ós bazeia de’it ba númeru eleitores maibé prepara 10% hodi troka hirak ne’ebé aat.
Totál eleitores iha Timor laran tomak hamtuk 859.613 ho sentru votasaun hamutuk 1.200 no estasaun de votus 1.500.
Jornalista: Carmelita Isaac
