Hatutan.com, (19 Marsu 2022), Díli—Kandidatu independente ba Prezidente Repúblika 2022-2027 ho númeru sorteiu 4, Rogério Tiago de Fátima Lobato afirma katak, eleisaun ida-ne’e sei laiha ema ida mak manan tanba demokrasia mak sei manan.
Kandidatu Rogério Tiago de Fátima Lobato ezerse direitu de votu iha sentru votasaun EP no 5 Kampung Baru, Comoro, Sábadu (19/03/2022). Foto/Hatutan.com.
“Hanesan kandidatu ha’u iha esperansa sei hetan votu balun, maski ha’u hakarak manan hodi servi rai ne’e, maibé depende ba desizaun povu no laiha ema ida mak manan ou lakon tanba Timor nia demokrasia mak manan,” Kandidatu Rogério Tiago de Fátima Lobato hateten ba jornalista sira, hafoin ezerse direitu de votu iha sentru votasaun EP no 5 Kampung Baru, Comoro, Sábadu (19/03/2022).
Kandidatu ne’e garante sei hetan votus iha sentru votasaun Eskola Primária (EP) númeru 05 Kampung Baru, Comoro maski la garante hetan vitória.
Advertisement
Tanba ne’e nia espresa sentimentu kontente bainhira ezerse direitu de votu iha tuku 8:00 dader Oras Timor Leste nian, hanesan sidadaun no sai hanesan parte ida hosi demokrasia.
Kandidatu ne’e husik hela mensajen ba povu atu vota ho hakmatek, kria estabilidade no pás tanba ema hotu-hotu hakarak partisipa eleisaun ne’e ho objetivu atu hadi’a Timor no la’ós atu sobu.
Totál eleitores iha suku Comoro hamutuk 30.497 ho sentru votasaun 12 mak hanesan Escola Bázika Filiál Fomentu, EPS Nicolau Lobato, EBF 12 de Outubru, ES Finantil, EBF Aimutin, EPS 30 de Agostu, EPS São Pedro, EP no 5 Kampung Baru, Eskola Alfatera Maslidun, Institutu Ciensia Saude, Edifisiu INAP (sentru Paralelu), Sede aldeia Aimutin.
Totál eleitores iha kapitál Díli hamutuk 190.710 ho sentru votasaun 130, estasaun de votus 237.