Polítika
Isabel Ferreira Optimista Povu Hili Loos
Hatutan.com, (19 Marsu 2022), Díli—Kandidata Prezidente Repúblika, Isabel Fereira optimista katak, eleisaun Prezidensiál tinan ne’e povu hili loos ema ne’ebé merese duni hodi sai Xefe Estadu.
Kandidata Prezidente Repúblika, Isabel Fereira vota iha sentru votasaun EBF Suku Meti-Aut, Sábadu (19/03/2022). Foto/Hatutan.com.
“Espera povu Timor-Leste halo desizaun ne’ebé loos no di’ak hodi eskolla Prezidente ida ne’ebé hadomi povu, tau-matan ba rai ida-ne’e liuliu liberta povu husi terus no ki’ak. Hau optimista maibé depende ba povu nia eskolla,” Isabel Fereira hateten ba jornalista sira hafoin vota iha sentru votasaun EBF Suku Meti-Aut, Sábadu (19/03/2022).
Notisia iha Relasaun:Milena Pires Fiar Eleisaun Prezidensiál Tinan Ne’e Justu
Isabel mós iha ninia preferénsia rasik maka, hakarak Prezidente ida ne’ebé povu hili besik povu, hamutuk ho povu ki’ak, ajuda sira sai hosi terus liuliu ajuda povu nia oan sira atu hetan oportunidade ba eskola.
Sentru votasaun EBF Meti-Aut rejista votante hamutuk 10.309. Durante prosesu eleisaun hetan seguransa másimu hosi Polísia Nasionál Timor-Leste (PNTL) no hetan observasaun hosi observadór internasionál no nasionál.
Jornalista: Vito Salvadór