Polítika
Lamukan Orgullu Vota Ba An Rasik
Hatutan.com, (19 Marsu 2022), Díli—Kandidatu Prezidente Repúblika Vígilio da Silva Guterres “Lamukan Fera Kakutak” orgullu tanba iha eleisaun Prezidensiál ba dala ida-ne’e vota ba nia an rasik.
Kandidatu Prezidente Repúblika Vígilio da Silva Guterres “Lamukan Fera Kakutak” vota iha sentru votasaun Grisenfor, Díli, Sábadu (19/03/2022). Foto/Hatutan.com.
“Importante ne’e maka ha’u iha laran, hola parte iha prosesu ne’e. Se uluk ha’u hili ema seluk, agora obrigadu ha’u tenke hili ha’u nia an,” Virgílio Guterres hateten ba jornalista sira, hafoin vota iha sentru votasaun Grisenfor, Díli, Sábadu (19/03/2022).
Notisia iha Relasaun:Eleisaun, Rogério Lobato Konsidera Demokrasia mak Manan
Lamukan prontu simu rezultadu eleisaun tanba rekoñese kapasidade atu konkista votu menus kompara ho kandidatu sira seluk.
Nia móe konsidera no rekoñese katak, iha eleisaun la’ós manan ka lakon, maibé ne’e nu’udár prosesu politika ida ne’ebé sai mós hanesan promosaun polítika ba sidadaun sira.
Hanesan kandidatu, nia prontu simu rezultadu eleisaun tuir kapasidade ne’ebé iha no sei foti ida-ne’e nu’udár referénsia no la konsidera eleisaun ne’e hanesan jogu ne’ebé atu buka manan no lakon.
“Se eleisaun ne’e hanesan jogu, ha’u prefere liu lakon ho dignidade do que manan ho moe,” nia hateten tán.
Iha nia haree katak, eleisaun Prezidensiál tinan ne’e marka diferénsa boot tanba iha sidadaun hamutuk 16 mak kompete no barak mak jerasaun foun no ida-ne’e lori signifikadu politika boot ba Timor-Leste.
Sentru votasaun Gricenfor rejista votante hamutuk 1.038. Durante prosesu eleisaun la’o hetan seguransa másimu hosi Polísia Nasionál Timor-Leste (PNTL) no hetan observasaun hosi observadór internasionál hosi nasaun CPLP no Uniaun Europeia, inklui observadór nasionál.
Jornalista: Vito Salvadór