MOE-UE Konsidera Eleisaun Prezidensiál iha TL Organizadu no Kompetitivu

Hatutan.com, (21 Marsu 2022), Díli—Misaun Observasaun Eleisaun Uniaun Europeia (MOE-UE) konsidera Timor-Leste (TL), hala’o eleisaun ida ne’ebé kredível, transparente no pasífiku bazeia ba liberdade fundamentál sidadaun sira nian tuir lei.

Misaun Observasaun Eleisaun Uniaun Europeia (MOE-UE), hala’o konferénsia imprensa iha Otél Timor, Segunda (21/03/2022). Foto/Hatutan.com.

MOE-UE  konsidera serbisu Sekretariadu Tékniku Administrasaun Eleitorál (STAE) organizadu tebes ba eleisaun ne’ebé ho kandidatu na’in 16, inklui feto na’in-haat, oras-ne’e MOE-UE kontinua nia misaun  hodi tuir prosesu apuramentu ne’ebé hala’o hela to’o iha rezultadu finál.

Notisia iha Relasaun:Ramos-Horta Manan iha Suku Bahu-Baucau “Ha-tohik” Baze FRETILIN

“Misaun ne’e to’o iha país ne’e hahú iha fulan-Fevereiru nia klaran, atu observa ho forma ida ne’ebé kompletu prosesu eleitorál. Iha loron eleisaun, observadór UE na’in-40 resin halo observasaun iha estasaun votasaun 174 resin iha munisípiu 12 no Rejiaun Administrativa Espesiál Oecusse-Ambeno,”  Xefe Observadór MOE-UE, Domènec Ruiz Devesa hateten iha Hotel Timor, Díli, Segunda (21/03/2022).

MOE-UE apresia ho kandidatu sira bele hala’o eleisaun sein restrisaun no kampaña hala’o ho dame, ho insidente balun de’it. Paktu dame ne’ebé organiza hosi Comissão Nacionál Eleição (CNE) karik kontribui ba ida-ne’e.

MOE-UE mós haree katak, maski kandidatu sira independente, balun hetan apoiu hosi partidu polítiku, no ida ne’e rezulta iha kompetisaun ne’ebé la hanesan, iha ne’ebé kandidatu balun hetan vantajen finanseiru no estruturál kompara ho kandidatu seluk.

Ambiente média pluralista fornese asesu ba opiniaun politiku oin oin. Misaun ne’e observa katak, média nasionál sira fornese tempu transmisaun ida ne’ebé gratuita no kobertura editoriál ba kandidatu na’in 16 ho dalan neutrál, maske iha kobertura balun ba notísia sira kona-bá kampaña la iha balansu.

Metade hosi kandidatu sira iha kampaña Facebook ne’ebé signifikativu. Iha prosedimentu sira votasaun no nia kontajen sira la’o di’ak.

“Ami nia observadór sira hateten katak, prosedimentu ba votasaun no kontajen sira la’o tuir dalan ne’ebé transparente no ho garantia sufisiente,” Ruiz Devesa hateten.

Deklarasaun preliminár hosi Misaun Observasaun Eleitorál UE nian fó-sai molok prosesu eleitorál remata.

Sei iha nafatin etapa importante, inklui rezultadu finál no desizaun ba reklamasaun eventuál sira, no ekipa husi Uniaun Europeia mantein nafatin iha país atu observa.

Jornalista: Vito Salvadór