Simu Taur Matan Ruak iha Rezidénsia, Lere Laiha Tempu Hasoru Alkatiri

Hatutan.com, (21 Marsu 2022), Díli—Iha Segunda 21 Marsu kuaze tuku 11:00, Primeiru Ministru (PM) Taur Matan Ruak hala’o vizita solidariedade ba rezidénsia Tenente Jenerál Reformadu Lere Anan Timur, Faról Díli hodi parabeniza nu’udár kandidatu ne’ebé konkorre iha eleisaun Prezidensiál tinan 2022.

Lere Anan Timur. Foto/Facebook.

Intensaun hosi vizita ne’e la ko’alia kona-bá asuntu segredu ruma, maibé hanesan alin mai kumprimenta de’it hodi parabeniza tanba kontribui ona ba eleisaun ida ho hakmatek.

Notisia iha Relasaun:Lere Anan Timur Sei Promove Diálogu no Halibur Jerasaun Tuan

“Ha’u mai atu fó de’it Parabens tanba kontribui ba eleisaun ida pasífiku, hakmatek no di’ak,” Taur Matan Ruak hateten ba jornalista sira iha rezidénsia ofisiál Lere Anan Timur, Faról, Díli.

Iha fatin hanesan Jenerál Reformadu Lere Anan Timur hateten, ohin ne’e la’ós Primeiru Ministru mak mai maibé ninia alin mak mai.

“Ha’u nia alin Taur mak mai tanba nia hatene katak ha’u la passa  ba Prezidente Repúblika mak nia mai nu’udár maun-alin ami nia solidariedade ba malu. Ami la trata buat seluk,” Lere Anan Timur hateten.

Lere mós hateten katak, eis Primeiru Ministru Mari Alkatiri mós mai, maibé Lere laiha tempu tanba sai tiha ba liur.

“Ohin eis Primeiru Ministru Mari Alkatiri mós mai, maibé ha’u laiha tempu tanba sai tiha ba liur,” nia informa tán.

Lere mós sei haree didi’ak bainhira Mari Alkatiri hakarak atu ba vizita dala ida tán, iha ninia rezidénsia, tanba mai hanesan Sekretáriu Jerál Partidu FRETILIN.

“Depois mak ita hare, Mari mai ne’e la’ós kualkér ema mak mai maibé Sekretáriu Jerál. Ha’u FRETILIN nafatin la’ós ha’u lakon bee ha’u la’ós ona FRETILIN. Se ha’u la FRETELIN ne’e ha’u nega ha’u nia maluk sira ne’ebé  fakar ran,”  nia deklara.

Lere Anan Timur rekoñese ho nia kandidatura ne’ebé falla ba etapa tuir-mai, nune’e apela ba apoiante sira atu haburas nafatin demokrasia iha rai ne’ebé harii ho ruin no raan.

“Demokrasia so buras kuandu demokrasia defende justisa no lia loos, maibé kuandu lori osan ho lia bosok ita nia futuru sei la’o rungu-ranga,” nia sublina.

Relasiona ho desizaun politika atu apoiu kandidatu seluk bainhira mosu segunda ronde, Lere Anan Timur seidauk responde tanba sei kolen hela.

“Ha’u seidauk responde tanba ha’u kolen durante ne’e ha’u mesak mak la’o hanesan oan-ki’ak ne’ebé ha’u la’o mesmesak, entaun ha’u kolen husik ha’u deskansa lai,” nia hateten.

Jornalista: Vito Salvadór