Hatutan.com (21 Marsu 2022), Díli—Tribunál Distritál Díli (TDD), kontinua hala’o julgamentu ba krime furtu agravadu ne’ebé deskonfia involve eis Prezidente Parlamentu Nasionál (PPN), atuál deputadu bankada CNRT arguidu Adérito Hugo da Costa, relasiona ho dada ahi illegál iha tinan 2016.
Tuir ajenda TDD nian katak, iha oras 17:00 lorokraik sei kontinua hala’o julgamentu no submete ba alegasaun hosi Ministeriu Públiku (MP) ne’ebé reprezenta hosi Prokuradór Rogério Viegas.
Notisia iha Relasaun:Kazu Adérito Hugo, Sasin Ida tán Deklara Aplikasaun Multa
Maibé, Tribunál deside adi’a julgamentu ba loron seluk tanba Tribunál la konsege notifika arguidu hodi mai tuir julgamentu, nune’e arguidu mós la marka prezensa maski Advogadu Privadu Pedro Aparicio reprezenta arguidu.
Ho razaun hirak-ne’e, Tribunál adi’a julgamentu ba loron 4 fulan Abríl tinan ne’e hodi rona alegasaun hosi MP.
Antes ne’e, tuir akuzasaun hosi Ministériu Públiku (MP), katak iha loron 02 fulan Maiu tinan 2016, bazeia ba relatóriu kontájen enerjia ne’ebé relata hosi EDTL hatudu katak, arguidu gasta enerjia normál $120 kada fulan, maibé realidade lista uza enerjia hahú fulan Juñu tinan 2016 to’o fulan Agostu 2017, arguidu gasta enerjia maioria entre $19 to’o $37.
Nune’e, depois de halo komparasaun kontájen ba gastu normál ho montante $120, konklui katak hahú periudu Juñu 2016 to’o Agusto 2017, arguidu nia konduta hamosu ona prezuizu ba Estadu ho montante globál $9.760.
Ho hahalok ne’e, MP akuza arguidu ba prátika krime furtu agravadu ne’ebé previstu iha artigu 251 no artigu 252 hosi kódigu penál TL.
Audiénsia julgamentu iha Segunda 21 fulan ne’e, prezide hosi juiz kolektivu Alvaro M. Freitas, Argentino Luíza Nunes, José Gonçalves, MP reprezentua hosi Prokuradór Rogério Viegas no arguidu hetan asisténsia legál hosi Advogadu Privadu Pedro Aparicio.
Jornalista: Carmelita Isaac
